KOINOT SIRI
Bizni qiziqtirar koinot siri,
Oʻsha yoqlarda ham bormikan hayot?
Birov “Bordir” – desa, “Yoʻq” – deydi biri,
Lekin ikkisi ham hanuz beisbot.
Aslida, mantiqqa bogʻliq bu jumboq,
Kutish ishtibohlar qoʻzgʻar odamda.
Kimdir ezgulikni yoʻq deydi mutloq,
Holbuki, yaxshilar koʻpdir olamda.
NASIHAT
Qaysidir zamonda donishmand bir zot
Boshqalar qatori kechirmish hayot.
Koʻribdi boyligu toʻqchilikni ham,
Koʻribdi muhtojlik, yoʻqchilikni ham.
Shoir aytganiday, yashash hajrida
“Goh aql oʻrnini bosgay tajriba”.[1]
U hayot sabogʻin shundoq deb bilmish,
Bir kun shogirdiga nasihat qilmish:
– Boʻtam, Alloh aylab baxtga muyassar,
Hazrati Xizrga yoʻliqsang agar,
Avvalo, muborak qoʻllarini oʻp,
Qutlugʻ izlarini – yoʻllarini oʻp.
Tila tilagingni, desalar shoshma,
Boshlarin qotirib haddingdan oshma.
Sira ikkilanmay murodingga koʻch,
Eng avval soʻragin bilagingga kuch.
Kuch seni xor qilmas aslo, hech qachon,
Xohla, qilich chopgin, xohla, chop ketmon.
Oʻrtaga chiqsang gar polvon boʻlgaysan,
Olqishu sovrinlar bilan toʻlgaysan.
Polvonning bir umr oʻchmagay shoni,
To kuchi bor ekan – butundir noni.
Ikkinchi tilakni ayt desalar boz,
Ovoz soʻra albat, ha, yangroq ovoz!
Balki boshliq boʻlib koʻkrak kergaysan,
Oʻsha ovoz bilan buyruq bergaysan.
Gulduros naʼrangni eshitgan zamon,
Jim boʻlib qolgaydir har qanday inson.
Ovozning yana bir xislati bordir,
Hofiz boʻlib olsang, nafi bisyordir.
Toʻyu tomoshaning toʻri seniki,
Barcha davralarning qoʻri seniki.
Oʻzi oqib kelar shuhrat va boylik,
Koʻrdingmi, hayoting qandoq chiroylik!
Xullas, turmushingni oʻylagin, boʻtam,
Insholloh, birovdan boʻlmagaysan kam.
Xizr yoʻldosh ekan – yoʻqdir muammo,
Uchinchi tilaging turibdi, ammo.
Gapni har yoqlarga endi burmagin,
Ortiqcha narsani soʻrab yurmagin.
Gohi kerak boʻlar u koʻhna naql,
Mayli soʻray qolgin ozgina aql.
2011 yil 1 may
APOKALIPSIS
Junbushga kelmoqda zamin betoʻxtov,
Goʻyo boshlangandek mudhish bir oʻyin.
Yonib ketayotir oʻrmonlar lov-lov,
Qitʼalarni bosar ajdardek quyun.
Zilzilalar tinmas, oʻkirar vulqon,
Otilar jahannam oʻti – lavalar.
Bu holning qoshida ahli Yer hayron,
Hayrondir muftiylar, ravvin, lamalar.
Cheksiz koinotning tirik vujudi
Balki toʻlgʻonmoqda zamonlar oʻtib.
Balki ummon boʻlgay togʻlar hududi,
Vaqt inson xohishin turmaydi kutib.
Balki milyard yillar ostonasida
Bundan battarrogʻin koʻrgandir zamin.
Balki Yaratgan ham koshonasida
Ortigʻin yoʻqotib, butlaydi kamin.
Lekin ne boʻlsa ham inson zotini
Soʻngsiz savollarga koʻmgay ushbu hol.
U faqat bilgaydir oʻz hayotini,
Chorasiz qolgaydir kelganda zavol.
Dafʼatan ayqashib yer bilan osmon
Doʻzaxning beshafqat shamoli yelsa,
Deysan, o, kibrga berilgan inson
Sen uni toʻxtatgin, qoʻlingdan kelsa.
Kerak boʻlarmikan bizning bu ashʼor,
Kimdir tursa agar koʻzlarin yoshlab.
Inshoolloh, rahm etgay Qodiri Gʻaffor,
Bandasin kulfatga qoʻymagay tashlab.
Shunchalar poyonsiz ekan bu ochun,
Uning na boshi bor va na adogʻi.
Samoda bir yulduz topsa ham yakun,
Kamayib qolmaydi uning sanogʻi.
Intiho yoʻq erur boqiy qudratda,
Mutlaq, abadiydir “Boʻl!” degan kalom.
Kim ketsa, oʻsha chogʻ, shaksiz, albatta,
Yangi bir zuryodga qoʻyilgaydir nom.
Ammo yuraklarda bordir bir alam,
U bois tugamas tashvishlar, gʻamlar.
Zamin talvasasi bosilganda ham
Bir-birin tinch qoʻymas, afsus, odamlar.
2011 yil 17 may
OʻYIN
Sochimni taramay taragunimcha
Boshimni ular tark eta boshladi.
Tegramga qaramay qaragunimcha
Doʻstlarim birma-bir keta boshladi.
Bunchalar chopagʻon boʻlmasa umr,
Bu otni toʻxtatib qololmagaysan.
Gohida berilgan salomga bir qur
Ulgurib alik ham ololmagaysan.
Fursating yetmaydi, atrofga qarab
Telpakni qoziqqa hatto ilishga.
Vaqting topilgaydir lekin, voajab,
Kimningdir dilini vayron qilishga.
Kimgadir kel deding ertaga shu payt,
Yaxshilik qilishga demak koʻngling toʻq.
Ertan sening uchun mavjudmikan, ayt,
Mavjud boʻlganda ham balki oʻzing yoʻq.
Umidni Allohga aylab havola
Balki termulgaysan koʻkka bedarmon.
Misoli oʻyinni buzdi bir bola,
U boshqa oʻyinga endi andarmon.
2011 yil 27 iyun
AVLODLAR
Bolaligim oʻtgan u chekka qishloq,
Koʻchasin oralab kezaman tanho.
Yoʻl usti, soʻraydi bir bola shu choq:
– Kimning hovlisini izlaysiz, bobo?
Men-ku erinmasdan kimligimni ham
Bolaga aytishim mumkin shu joyda.
U meni tinglar yo tinglamas, qaydam,
Buning barchasidan unga ne foyda.
Axir oʻtib ketdi necha oʻnlab yil,
Oʻsha kezlarimni eslayman hamon.
Endi begonaman, garchi bu manzil
Menga ham boshpana boʻlgan bir zamon.
Bolaga baribir beraman savol
Ota-bobolarin soʻrab atayin.
Qay biri oʻzimga xeshdir ehtimol,
Va lekin koʻplarin yoʻqligi tayin.
Bola eslab qolar balki bu holni,
Otasi choyini shopirar ekan.
Bola der: – Koʻchada koʻrdim bir cholni,
Xuddi oʻzimizday gapirar ekan.
2011 yil 3 iyul
SURAT
Biror surat chizsak eskilar shu on,
– Bas qil, gunohiga qolma, derdilar.
Sendan jonin soʻrar har bir tirik jon,
Jonlining suratin solma, derdilar.
Oʻsha aqidalar endi koʻp yiroq,
Bilgayman lof bilan rostning farqini.
Mendan-ku musavvir chiqmadi, biroq
Boshimga koʻtargum rassom xalqini.
Behzod chizib ketgan ajib chamanda
Hanuz aziz zotlar yurgan kabidir.
Siz “Mona Liza”ga boqing, chamamda,
Joni oʻzi bilan turgan kabidir.
Buyuk sanʼat bilan faxr etar jahon,
Goʻzallik mulkining ganjidir bari.
Lekin xayolimdan ketmaydi hamon
Oʻsha eskilarning oʻsha gaplari.
Bir kun suratingni chizgum muqarrar,
Mehnatim behuda ketmasmi ekan.
Sening ham joningni soʻrashsa agar,
Mening muhabbatim yetmasmi ekan.
2011 yil 4 iyul
HASSA VA QALAM
Tiriklik meni ham izmiga solgan,
Hoyu havaslarning koʻpi yoʻqolgan.
Endi tinch yur sen ham, axir qoʻlimda
Faqat bir hassayu qalamim qolgan.
2011 yil 6 iyul
SINGIL
Boʻritosh Nosirovaga
Quyosh botib ketgan, shom edi qaro,
Xayoliy maktubni yoʻlladim senga.
Qadimiy Nasafning gumbazi aro
Yilt etgan shuʼladek koʻrinding menga.
Yiroqda boʻlsang ham, goʻyo samodan
Kelgandek, mehringni ilgʻaydi koʻngil.
Men uchun qachondir Orif bobodan
Yodgor qolgandeksan, Boʻritosh singil.
Kun kecha ayrilmay yurgan doʻstlar ham
Oʻylab salomlashgan paytlar koʻp boʻldi.
Faqat sendaylarni eslaganim dam
Qalbimning qaysi bir kemtigi toʻldi.
Senday singillari boʻlmasa agar
Hatto bahodirlar qolgay parishon.
Koʻkda-ku malaklar bordir muqarrar,
Ular zaminda ham mavjuddir, ishon!
Boshingga oʻragan shu harir roʻmol
Ezgulik tugʻiga yalov boʻlgulik.
Shukr, singillar bor sendek barkamol,
Oʻchgan oʻchoqqa ham olov boʻlgulik.
2011 yil 4 iyul
MEROSIYLIK
Zuhro nega yashnaydi,
Yarqiraydi nega oy.
Ularning ham olamda
Egasi bor hoynahoy.
Oftobning mahobatin
Koʻray desang sen agar,
Shom choʻkkanda kunbotar
Shafagʻiga sol nazar.
Kimdir yaxshi soʻz bilan
Taʼriflasa biror on,
Bu kabi maqtovlardan
Taltayib ketma, inson.
Magar taʼma yoʻq ekan
Savobu imdodingda,
Shundoq bir xislat oʻtgan,
Demakki, ajdodingda.
Qayga borma, topilgay
Albatta, odam nasli.
Firibgar ham yangidan
Paydo boʻlmagan asli.
Ular ham suyak surib
Kelayotir azaldan.
Hattoki joy olishgan
Qasidayu gʻazaldan.
Oʻylab koʻrsang, iymonga
Tegishlidir bu kalom:
“Qadim oʻzbek xalqisan” –
Degandi Gʻafur Gʻulom.
Faxr eturman shu elga
Men ham farzand erurman.
Bobolarga tutashgan
Bitta dilband erurman.
Oʻrnim bordir olamda
Oʻzgalardek barqaror,
Bobolar tufaylidir
Menda ne fazilat bor.
Bir zamon oʻtgan edi
Shoir Turdi Farogʻiy,
Bitta edi u zotning
Armoniyu firogʻi.
U zamon xalqqa shoir
Birlashgin, degan edi.
Qay qavmdan boʻlsang ham
Sirlashgin, degan edi.
Nur sochib turgan kabi
Oʻsha quyosh, oʻsha oy,
Xalqimning tayanchidir
Asli iymon, hoynahoy.
Dafʼatan tutilganda
Osmonning oftob, mohi,
Oʻsha shoir Turdini
Eslab qoʻyaman gohi.
Bitta deb bildim doim
Qadim oʻzbek yerimni,
Bagʻishladim men unga
Madhiyamni – sheʼrimni.
Bu elni olam aro
To abad tanho dedim.
Kichkintoy vakilin ham
Payt kelsa daho dedim.
Chunki u mening uchun
Tuganmas armon erur,
Buyuk Vatan qurgali
Ulugʻ bir imkon erur.
2011 yil 16 avgust
ZAR VA ZIYo
Hikoyat
Bu dunyoda zar qadrin
Bilmaganlar nodondir.
Zarni ziyo degan-chi
Nodondan ham yomondir.
Allaqaysi zamonda
Katta bir boy boʻlarkan.
Zari koʻp-u, ilmi yoʻq,
Shundan u or qilarkan.
Umr tegirmon emas,
Aylanmaydi qaytadan.
Aqling toʻlishgan bilan
Ozayib borar badan.
Xudo berib oʻsha boy
Farzandga ham boy ekan.
Uning uch oʻgʻli bor-u,
Bari erkatoy ekan.
Oʻyladi boy bir kuni:
– Men-ku oʻtdim besavod.
Zora farzandlarimga
Yuqsa ilm va ijod.
Axir oʻqsiz ovlayman
Uchib yurgan gʻozni ham.
Boyligim bor, yollayman
Eng oʻjar ustozni ham.
Boyning yoshlik chogʻidan
Ajib feʼli bor edi.
U sanʼatni sevardi,
Qoʻshiqqa xushtor edi.
Zoʻr hofizni bir kuni
Qoshiga chorladi boy.
Qoʻyniga qoʻlin solib,
Ogʻzi-burnin qildi moy.
Dedi: – Dongdor etgansiz
Hatto qalmoq, moʻgʻilni.
Hofiz qilib bergaysiz
Bizning katta oʻgʻilni.
Kun ketidan kun oʻtdi,
Oqib turdi boylik ham.
Ustoz hofiz ter toʻkdi
Shogird uchun chinakam.
Va lekin chumolidan
Fil yasab boʻlmas ekan.
Hattoki, jun arqonga
Qil yasab boʻlmas ekan.
Katta oʻgʻil aslida
Yoqtirardi qimorni.
Behudaga erta-kech
Qiynar edi dutorni.
Bir kech ulkan saroyda
Oʻtar boʻldi zoʻr bazm.
Unga katta oʻgʻil ham
Borishga qildi jazm.
Boy oʻtirar, koʻnglida
Umidi bordir, illo.
Shuncha sarfu xarajat
Bekor ketmas, inshollo.
Yonida chaqasi yoʻq
Kuychilar ham chiqdilar.
Bashang, yalang, xilma-xil
Toʻychilar ham chiqdilar.
Bosh hakam xonning oʻzi,
Jiddiy boqar, kulmaydi.
Afsuski, bunday zotni
Sotib olib boʻlmaydi.
Oxirida saman ot
Kimgadir beshak tegdi.
Afsus, afsus, oʻgʻilga
Oddiy bir eshak tegdi.
Boyning endi tamoman
Hafsalasi pir boʻldi.
Yutqizgani bir boʻlsa,
Ketqizgani bir boʻldi.
Dedi: – Endi yoʻq chora,
Alamni kimdan olay.
Yaxshisi, hofizlarni
Tinglamay qoʻyaqolay.
Endi oʻrtanchi oʻgʻil
Turar edi navbatda.
Bor unga tavajjuhi,
Ishonchi ham, albatta.
Tuppa-tuzuk yigit u,
Kam-koʻsti qolmagan-da.
(Baʼzan qoʻshiq aytishin
Hisobga olmaganda).
Unutilib ketadi
Maqtaganing, urganing.
Bu dunyodan oʻtsang ham,
Turaberar qurganing.
Hassani bir yoʻqotdim,
Bu yogʻini bilaman.
Oʻrtanchi oʻgʻlimni men
Katta meʼmor qilaman.
Shundoq deya, boy yana
Zarini ishga soldi.
Meʼmor degan hujjatni
Oʻgʻil qoʻliga oldi.
Boy dedi: – Oʻgʻlim, faqat
Savob yoʻlin tutgaysan.
Koʻprik qurgin, ustidan
Avval oʻzing oʻtgaysan.
Oʻgʻil bilmas bu ishning
Toʻgʻri-yu xatosini.
Bir kuni koʻprik yasab,
Chorladi otasini.
Jam boʻlgandi elu-yurt,
Meʼmor xursand oʻzicha.
Qadam qoʻydi koʻprikka,
Koʻpchilikning koʻzicha.
Obbo, koʻprik degani
Moʻrt boʻlmasa bunchalik.
Uning holi yoʻq ekan
Bir qadam qoʻygunchalik.
Sinib ketdi bor budi,
Qasir-qusur, haloplab.
Meʼmor quladi oʻzi,
Soy suviga shaloplab.
Boy shoʻrlikni qora ter
Bezgak kabi bosgandi.
Ikkinchi umidin ham
Shu koʻprikka osgandi.
Yoʻliqqandi dardga u,
Yuragi ham oʻynardi.
Bir kuni qandi oshsa,
Bir kun bosim qiynardi.
Mol dunyoning agarda
Shu boʻlsa karomati,
Yaxshisi, jonni olgin,
Kelgin, goʻr qiyomati.
Lekin inson zotiga
Hamishalik umid yor.
Boymi u kambagʻalmi
Tiriklikdan umidvor.
Endi kenja oʻgʻilning
Kasbi ham unga bogʻliq.
Qadimgilar aytgandek
Avvalo tani sogʻliq.
Oʻnta doʻxtir yasashga
Qurbim yetar, dedi u,
Oʻnta hamyon, mayliga
Ketsa ketar, dedi u.
Varrakboz oʻgʻilchani
Shaharga joʻnatdi boy.
Oʻlik-tirik sovgʻaning
Sanogʻi yoʻq, hoynahoy.
Yana yillar oʻtdilar
Goh chopib, goh imillab.
Boy ham yurdi kun sanab,
Hamma yogʻi simillab.
Eng katta tabiblarning
Muolajasin oldi.
Biri issiqqa tiqsa,
Biri sovuqqa soldi.
Kenjatoy oʻgʻilni ham
Boyning zari oʻqitdi.
Doʻxtirlikning yasama
Savatlarin toʻqitdi.
Bir kun oʻgʻil otaga
Maqtab iqtidorini,
Ichkizib qoʻya qoldi
Allaqanday dorini.
Kim bilsin, boy shoshdimi,
Yoki birov shoshirdi.
Oʻsha fursat bechora,
Omonatin topshirdi.
Masal emas bu gaplar,
Yoyinki asal emas.
Kambagʻal salomatu
Boy boʻlgan kasal emas.
Aslida zar qadrini
Bilmaganlar nodondir,
Zarni ziyo deganlar
Nodondan ham yomondir.
2011 yil 22 iyun
Abdulla ORIPOV,
Oʻzbekiston Qahramoni,
Xalq shoiri
“Yoshlik”, 2011 yil, 10-son
[1] A.Pushkin satridan
https://saviya.uz/ijod/nazm/shunchalar-poyonsiz-ekan-bu-ochun/