MAMEDOVA Tursunoy Sotiboldiyevna

MAMEDOVA Tursunoy Sotiboldiyevna (1941.14.10, Uchqoʻrgʻon tumani — 1996.4.5, Namangan) — xonanda. Oʻzbekiston xalq artisti (1991). Namangan teatri (1957—62 va yana 1972-y. dan) da, 1962—72 y. lar Muqimiy teatrida ishlagan. «Singillar kissasi» spektaklidagi Iqbol uning sahnada yaratgan ilk obrazidir. Mamedova murakkab obrazlarning eng nozik qirralarini, ichki kechinmalarini tomoshabinga taʼsirli kilib tasvirlagan. Mamedovaning aktyorlik mahorati Omina («Sindirilgan koʻza»), Mo-him («Tohir va Zuxra»), Oftob («Mashrab»), Sanobar («Hamza»), Ajar («Suymaganga suykanma»), Zebi («Xolisxon»), Oqqiz («Ravshan va Zulxumor»), Joʻraxon («Fargʻona hikoyasi»), Gulshan («Guli siyoh»), Oysuluv («Jon qizlar»), Manzura («Gavhari shamchiroq») va b. da, ayniqsa, «Yusuf va Zulayho» musiqali dramasidagi Zulayhoda, dramatik mahorati esa I. Drutsening «Kase Mare» psixologik dramasidagi Vasilutseda alohida namoyon boʻldi. Mamedova, shuningdek, «Bobur» videofilmida Bobur mirzoning onasi — Qutlugʻnigor, «Kecha va kunduz» videofilmida Xadicha kabi rollarni ijro etgan. U xalq qoʻshiklari, lapar va termalarni oʻz doirasi joʻrligida aytishda yetakchi ijrochilardan boʻlgan. «Ishqingni avayla», «Laylomisan san», «Dilda ishqing» kabi ashulalari bilan tanilgan.