Sen baxtingni – yoʻlni oʻzing tanlading,
Men-chi, qoʻl silkidim dutor chalganday.
Bir yomon qiynaldim, nomus qildim soʻng
Bunday qismat faqat menga kelganday.
Aslida, kim sevib baxtiga yetgan,
Qancha birga boʻlgan sevgi va visol?
Barcha chin oshiqlar omadsiz oʻtgan,
Tolening kulgani xayoldir, xayol.
Senda ham, menda ham yoʻq edi ayb,
Shu sabab dardimni ichga yutaman:
Oldin seni soʻkib olaman toʻyib,
Keyin… Keyin seni oʻylab yotaman.
Orif Tolib
2011
https://saviya.uz/ijod/nazm/keyin/