SEN VA YOMGʻIR
Yomgʻir yogʻar. Tom uzra qitmir
Bola kabi sakrar tomchilar.
Yomgʻir yogʻar. Tomchilar ritmin
Tinglab, yodim guldek ochilar.
Yomgʻir yogʻar. Zamin olar tin –
Oʻylamasdan mehnat darsini.
Koʻz oldimga keltiraman jim
Shtrausning shoʻxchan valsini.
Hoʻl boʻladi pichan gʻarami,
Tevarakni tutar yoz isi.
Huv, terakzor – hislar harami,
Yuviladi izhorlar izi.
Bosiladi yoʻllarda gʻubor,
Majnuntollar qaraydi oʻksib.
Chuqur nafas olar tutqator
Nam havoga toʻldirib koʻksin.
Sen oynadan boqasan gʻamgin,
Nahot, soflik yetmadi sanga?
Yomgʻir singan oyna koʻzidan
Sizib kira boshlar xonangga.
DILGA BORAR YOʻL
Somon yoʻli qalbingga eltar,
Biroq unda adashmoq oson.
Baxt izlagan yoʻqolar-yitar
Soʻngan yulduz kabi – begumon.
Ipak yoʻli – qalbingga koʻprik,
Hislarimdan karvon tortaman.
Tuyalarga mangu ayriliq
Va koʻzyoshim durin ortaman.
Somon yoʻli – samo xilvati,
Jimirlaydi sirli yogʻdular.
Ipak yoʻli – gʻarib ulfati,
Zarralari – porloq injular.
Yor, qalbimni tevaga ortdim,
Tuya choʻkib oldi, yurmadi.
Ikki yoʻldan tanlab qay birin,
Senga qanday borar – bilmadim!
SOYa
Sen yoʻq eding. Eshikdan kirib
Keldi gʻamning kulrang soyasi.
O, yoʻq edi bunda sir, firib,
Tingan edi baxtning ham sasi.
Qafasiga oʻrgangan qushdek
Unga boqdim umidvor, sokin.
Nigohimda yoʻq edi hadik,
Qalbim titrab turardi lekin.
Yarim kecha qaytding kayfing chogʻ
Soʻzlagancha yolgʻon-rostingni.
Koʻzlaringda suzardi charchogʻ,
Sen koʻrmading yangi doʻstimni.
Men unga: “Qol!” demovdim, ishon,
Nega hanuz ketmaydi, bilmam?
Oʻrtamizda oʻshandan buyon
Yashayotir kulrang soya – gʻam.
TOʻRTLIK
Oshiq dilim nayda manim,
Nayistonim qayda manim?
Yerda nega giryon kezgum,
Gʻamim buncha mayda, manim?
SUZAYOTGAN OY
Halok boʻlgan botir qalqoni
Misol koʻkda suzar toʻlin oy.
(Nikolay GUMILYOV)
Qishda uygʻoq qolgan ayiqday
Besaranjom kezinar kecha,
Oy suzadi kumush qayiqda
Oshiqlarning xayolin icha.
Osmon yigʻar bulutdan qoʻshin,
Chorlov kabi yonadi chaqmoq.
Oy tushmayin kumush qayiqdan
Nurin tarar: moviy, sargʻish, oq.
Chaqmoq yonar yana dargʻazab –
Birlashganday million koʻzlar.
Shoh qahridan qoʻrqqan kanizak
Kabi titrab turar yulduzlar.
Noz qiladi oy, nimasiga?
Bulut uni qoʻymagay xoli –
Yelenani oʻz kemasiga
Chorlayotgan Paris misoli.
TUGʻDONA
Tugʻdona butasiday
Metindir koʻnglim manim.
Fursatni qoʻldan bermay
Tumor yasa, suyganim.
Yoʻldosh boʻlayin toki,
Tulporing hech tolmasin.
Beli zirqirab yoki
Ora yoʻlda qolmasin.
Tigʻingni ushla mayin,
Yor, qahrga ber barham.
Mehr yumshatar tayin –
Hatto tugʻdonani ham.
HOVUZ VA MAJNUNTOL
Hovuz – pahlavonning hovuchi,
Unda sochin chayar majnuntol.
Kaftigacha yetib soch uchi
Botir qalbi titranar xushhol.
Goʻzallikka matonat panoh,
Guvoh boʻlar makon va zamon:
Shu majnuntol quriguncha to
Hovuchini tortmas pahlavon.
Gulnoz MOʻMINOVA
“Sharq yulduzi” jurnali, 2015–3
https://saviya.uz/ijod/nazm/jimirlaydi-sirli-yogdular/