IMO-ISHORA TILI — qoʻl, tana turli harakatlari va b. xil imo-ishoralar yordamida fikr almashuv, aloqa qilish. I-i. t. dan quyidagilar foydalanadi:
1) kar-soqov va koʻzi ojiz karsoqovlar. Kar-soqov bolalar doirasida beixtiyor, hech bir tayyorgarliksiz yuzaga keladigan fikr almashuv tizimidan kodlashtirilgan (barcha savodli karsoqovlar uchun umumiy boʻlgan) I-i. t. farqlanadi;
2) tovushlarga asoslangan til yordamida bir-birini tushunishning iloji boʻlmagan vaziyatlarda, mas, uzoq qardosh boʻlgan til vakillari (Shim. Amerika indeyslari, Avstraliyaning tub aholisi va b.);
3) tovushlar yordamidagi nutqqa tabu eʼlon qilingan holatlarda, mas, rohiblarning bir toifasi, Kavkazdagi baʼzi xalqlarning ayollari va b.