GUAM

GUAM — Tinch okeanning gʻarbiy qismidagi orol, Mariana o. lari toʻdasida. Guamni 1521-y. F. Magellan kashf etgan. AQSH mulki, Tinch okeandagi yirik harbiy-dengiz va harbiy-havo bazasi. Mayd. 549 km2. Aholisi 145 ming kishi chamasida (1990-y. lar oxirlari), 20 mingdan ziyodrogʻi Amerika harbiy xizmatchilari va ularning oilalari, krlganlari ispanlar, meksikaliklar, filippinliklar. Orolning eng baland (405 m) jan. qismi vulkan jarayonida, pastroq shim. qismi marjon qoyalardan paydo boʻlgan. Tez-tez zilzila boʻlib turadi. Iqlimi tropik, mussonli iqlim, oylik oʻrtacha t-ra 26 — 27°, yiliga 3000 mm yogʻin tushadi. Togʻlarning jan. va sharqiy yon bagʻirlarida nam tropik oʻrmonlar, shim. da kserofit gʻalla gulli oʻsimliklar oʻsadi. Iqtisodining asosi — turizm. Har yili orolga 600 ming turist (80% yaponlar) kelib ketadi. Daromadining 12%i harbiy obyektlardan keladi. Kokos palmasi, kofe oʻstiriladi, shakarqamish va b. tropik ekinlar eqiladi, sholi yetishtiriladi. Baliq ovlanadi. Yogʻoch tayyorlanadi. Bosh shahri — Aganya (aholisi 2 mingdan ortiq). Guamda t. y. yoʻq, avtomobil yoʻllari uz. 674 km. Chetga kiyim, turli xil ichimliklar, tamaki, mashinasozlik mahsulotlari chiqariladi; chetdan yoqilgʻi, oziq-ovqat mahsulotlari keltiriladi. Tashqi aloqa asosan AQSH, Yaponiya va Tayvan bilan olib boriladi. Un-t bor.