VERMER

VERMER Delftlik (Vermeer van Delft) Yan (1632. 31. 10 – Delft – 1675.15.12) — golland rassomi. Delftda ishlagan. U yaratgan shaharliklar hayotidan olingan kichik ishqiy rasmlar («Xat oʻqiyotgan qiz», «Bir bokal vino»), tabiat manzaralari aks etgan asarlari («Delftning koʻrinishi», «Kichkinagina koʻcha» va b.)da kundalik hayotni shoirona his eta bilish, mujassamotlarni mumtoz aniqlik bilan yaratilgani, borliqni qanday boʻlsa shundayligicha tasvirlangani hamda tasvirlar hayotiyligi, boy va nozik koloriti bilan koʻzga tashlanadi.