VASSOF

VASSOF, Abdulloh ibn Fazlulloh Sheroziy (13-a. 2-yarmi — 14-a. 1-choragi) — tarixchi, Vassof al-Hazrat — «Oliy hazratlarining vasf qiluvchisi» laqabi bilan shuhrat qozongan. Erondagi Hulokuiylar davlatining moliya devonida xizmat qilgan. 1328-y. «Tajziat alamsor va tazjiyat al-aʼsor» («Viloyatlarning boʻlinishi va asrlarning oʻtishi») nomli tarixiy asarini yozib tugatgan. U «Tarixi Vassof» («Vassof tarixi») nomi bilan mashhur boʻlib, 5 qismdan iborat. 1257-y. dan 1328-y. gacha boʻlgan davrni qamrab olgan. Asar Eron tarixi uchun qimmatli manba hisoblanadi.