Usta Shirin

Post Views:
294

USTA SHIRIN Murodov (1879–1957.12.2) – me’mor, ganch o‘ymakori; O‘zbekiston FAning faxriy a’zosi (1943), O‘zbekistonda xizmat ko‘rsatgan san’at arbobi (1943). O‘z ijodida ganch o‘ymakorligi an’analarini mahorat bilan qo‘llagan, ularni yangi mazmun va shakllar bilan boyitgan, ilk bor ish faoliyati (ganch o‘ymakorligi)da naqsh zamirida ko‘zgudan foydalandi, ya’ni ko‘zgu ustiga ganchkori naqshlar ishlab, jozibadorlikka, ajoyib naqsh jilvasiga erishdi.

Usta Shirin 1943 yildan Toshkentda. U shahardagi ko‘plab jamoat va ma’muriy binolarni nafis ganchkorlik naqshlari bilan bezadi: Toshkent kuranti, Navoiy teatri (Buxoro zali), Muqimiy teatri, hozirgi Alisher Navoiy nomidagi adabiyot muzeyi va boshqalar; me’moriy obidalarni ta’mirlashda qatnashdi. Usta Shirin ko‘plab shogirdlar yetishtirgan: Samarqand ta’mirchilar maktabi, Toshkent qurilish san’ati maktabi (1940–42), Moskva badiiy san’at bilim yurti (1942–43), P. Benkov nomidagi respublika rassomlik bilim yurti (1952–57)da dars bergan. Chig‘atoy qabristoniga dafn etilgan. Davlat mukofoti laureati (1948). «Buyuk xizmatlari uchun» ordeni bilan mukofotlangan (2001). Toshkent ko‘chalaridan biri uning nomi bilan ataladi.

USTA SHIRIN KO‘CHASI – Sobir Rahimov va Yunusobod tumanlariga qarashli Miskin, Jomiy, Usta Shirin va «Yangiariq» mahallalari hududida. Uzunligi 3 km atrofida. Qorasaroy va Sandiqqo‘rg‘on ko‘chalari oralig‘ida. 20-asrning 1-yarmida tashkil topgan. 1957 yil 20 sentyabrda mashhur xalq ustasi Usta Shirin nomi berilgan. Yo‘nalishida ishlab chiqarish korxonalari, dizayn, mashinasozlik kasb-hunar kollejlari, metallbaza, bozor shoxobchasi, qurilish mollari va elektr uskunalari savdo majmuasi, «Yangiariq» supermarketi, turli servis xizmat ko‘rsatish maskanlari, shaxsiy va ko‘p qavatli turar joy binolari va boshqalar joylashgan. Ahmad Donish, Shim. Olmazor, Jomiy va Shiroq ko‘chalari bilan tutashgan.

“USTA SHIRIN” MAHALLASI (Korhojiota-1 ko‘chasi, 29) – Yunusobod tumanidagi mahalla. «Turkqo‘rg‘on», «Yangiariq», «Oqibat» mahallalari bilan chegaradosh. 1930–46 yillarda mahalla hududi 20 gektardan ortiq maydonga ega bo‘lgan bog‘lardan tashkil topgan. Bu bog‘lar asosan shayxontohurliklar, sebzorlik va oqtepaliklarning bog‘ uylari bo‘lgan. O‘sha paytda mahalla nomi Korxojaota (asli Qoraxo‘jaota) edi. 2-jahon urushi tugashi bilan bu bog‘lar xususiy uy-joy qurish uchun aholiga bo‘lib berilgan. 60-yillar oxiri – 70-yillar boshida mahalla nomi o‘zgartirilib, «1-Kislovodskiy» deb nomlangan. 1992 yil mashhur xalq ustasi Usta Shirin nomi berilgan. Aholisi 3180 kishi, ko‘p millatli. Mahalla hududida «O‘zekspomarkaz», «Toshkent teleradio uzatish markazi», «Kamalak-TV» qo‘shma korxonalari, 2 oziq-ovqat do‘koni, o‘rta maktab, bolalar bog‘chasi mavjud. Mahallada akademik Murod Sharifxo‘jayev, pedagogika fanlari doktori Asqar Zunnunov, bastakorlar Doni Zokirov, Nabijon Hasanov istiqomat qilgan.

«Toshkent» ensiklopediyasi. 2009 yil