Dardli sheʼrlar meʼdamga tegdi,
Shodon-shodon qoʻshiqlar aytsam.
Uchqur qanot bogʻlab, qaniydi,
Oʻsha yorugʻ kunlarga qaytsam.
Meni ortiq ezmasa alam,
Koʻtarmasam ayriliq yukin.
Butun umr bilmasdan oʻtsam
Sogʻinch degan azob borligin.
Men Yer kabi bir izdan yursam,
Yoʻllarimiz har kun tutashsa.
Har kun oyday yuzingni koʻrsam,
Koʻzlaringdan koʻzim qamashsa.
Oʻngga doʻnib bu shirin ertak,
Sen bilan soz-suhbatlar qursam.
Oldingidek doʻstu yor boʻlsak,
Sevishimni bilmasang sen ham.
Orif Tolib
2011
https://saviya.uz/ijod/nazm/orzu/