MIKROFLORA

MIKROFLORA (mikro… va flora) – muayyan tabiiy muhit (tuproq, suv, havo, oziq-ovqat mahsulotlari, hayvon, oʻsimlik, odam organizmi yoki organlari) da yashaydigan mikroorganizmlar majmui. Mikroflora termini, odatda, tabiiy substratlarga nisbatan koʻllanadi. Mikroorganizmlarning muhitdagi soni tekshirilayotgan moddaning maʼlum hajmini qattiq yoki suyuq oziq muhitida oʻstirish yoki b. yoʻllar bilan aniqlanadi. Ifloslanganlik darajasiga qarab 1ml suvda 5 mingdan 100 minggacha, 1 g tuproqda 2—3 mln. gacha mikroorganizmlar boʻlishi mumkin. Odam va hayvonlar terisi, shilliq pardalari, meʼdasi, ichaklari va b. organlari ham Mikrofloraning doimiy yashash joyi boʻlib, normal sharoitda organizmga ziyon yetkazmaydi.