ADRIATIKA DENGIZI

ADRIATIKA DENGIZI — Oʻrta dengizning bir qismi, yarim berk dengiz. Apennin va Bolqon ya. o. lari oraligʻida. Jan. da Otranto boʻgʻozi orqali Ioniya dengizi bilan tutashgan. Mayd. 144 ming km2. Oʻrtacha chuq. 200 m, eng chuqur yeri 1230 m. Sharqiy qirgʻogʻi yaqinida Dalmatsiya orollari bor. T-rasi suvning yuza qatlamida avg. da 24-26ʻ, fev. da 7-13°. Shoʻrligi 35-38%o. Suv koʻtarilishi va qaytishi yarim sutkali (1,2 m). Baliq ovlanadi. Shelf qismidan neft va gaz qazib olinadi. Venetsiya va Triyest qoʻltiqlari bor. Portlari: Triyest, Venetsiya (Italiya), Split (Xorvatiya), Durres (Albaniya). Sharqiy sohilida kurortlar bor.