Emil KROTKIY
***
Aks – sado hamma savollarga javob qaytaradi, ammo savollar bilan-da.
***
Yaxshi hikoya qisqa boʻlishi kerak. Yomoni undan ham qisqa.
***
Har qanday balchiq shifobaxsh emas.
***
Shlyapani boshga qarab tanlashadi, aksincha emas.
***
Yomgʻirli havoda chiqqanligi uchun ham… qoʻziqorinlar soyabon (yomgʻirpoʻsh) shakliga ega.
***
Ayollar dissertatsiyaga oʻxshaydi: ularni himoya qilish kerak.
***
Dam olishdan qaytgach, maqtandi: boshligʻimiz bilan bitta dengizda choʻmildim.
***
Ikki kishilashib yozishdi, shuhrat esa bittasiga ham yetmadi.
***
Dengiz suvining shoʻrligiga ishonch hosil qilish uchun uning hammasini ichish shart emas.
***
Chumchuqning nazarida avtomobilm otga nisbatan unchalik takomillashmagan: u goʻng bermaydi.
***
Kasalliklarni uzoq qarindoshlar ham meros qilib olish huquqiga ega.
***
Pyesada va zalda boʻsh joylar koʻp edi.
***
Oʻzining kichkina oilasi uchun u katta odam edi.
***
Hayot maktablarida oʻzlashtirolmaganlarni qayta bosqichda oʻqishga qoldirishmaydi.
***
Oʻzidan baland turganligi uchun ham, togʻlarni yoqtirmasdi.
***
Donishmandlar va tish shifokorlari ildizga qarashadi.
***
Hikoya shunchalik qisqa ediki, muallifning isteʼdodsizligini zoʻrgʻa yopib turardi.
***
Hayotga yengil munosabatda boʻlish uni ogʻirlashtiradi.
***
Uning omadi keldi: uni urib yuborgan “Tez tibbiy yordam” mashinasi edi.
***
Noxush telegrammalar hamisha kechikmasdan yetib keladi.
***
Har xil usulda suzishadi. Choʻkish esa bir xil.
***
Koʻzoynak doʻkonida: “Janob, sizning koʻzingiz bu oynaklarga toʻgʻri kelmayapti”.
***
Tish ogʻrigʻi arzimagan narsa, agar ogʻriyotgan tish boshqaniki boʻlsa.
***
Hajviy jurnal: “Hazildan tashqari”
***
Shaharlik bola. Toʻrt oyoqlilardan faqat stulni koʻrgan.
***
Agar oʻgʻrilar koʻpchilikni tashkil etganda halollik jinoyat kabi jazolanadigan boʻlardi.
***
Qariyalarga ularning yoshligida pillapoyalar bunchalik tik boʻlmaganday tuyuladi.
***
Maymundan kelib chiqqanligini bilardi, ammo, aynan qaysinisidanligini eslolmasdi.
***
Qora ishlar bilan ham oq nonga pul topishadi.
***
Biz u bilan parallel chiziqlarga oʻxshardik: yonma yon borardik, lekin kesishmasdik.
***
– Siz andak shoshmay turing. Besh minutlik yigʻilishimiz qirq minutdan ortiq choʻzilmaydi.
***
Turmush ongni belgilaydi, ichish uni loyqalashtiradi.
***
Yengil-yelpi aloqalardan ogʻirroq narsa yoʻq.
***
Qurt olma unga yashash joyi uchun yaratilganligiga ishonardi.
***
Men yuz grammdan ortiq ichmayman. Ammo yuz gramm ichgach, boshqa odamga aylanaman, oʻsha boshqa odam juda koʻp ichadi.
***
Shifokor ichishni taqiqlagani uchun alamidan ichdi.
***
Omading yurishmagan shahar, arxitekturasi boʻyicha ham, qiziqarli emasga oʻxshayveradi.
***
Ibratni boshligʻidan, porani qoʻl ostidagilardan olardi.
***
Odamlar orasidagi munosabatlarda yolgʻon mashina uchun moyga oʻxshaydi: u qarshilikni kamaytiradi.
***
Hech narsa oʻqimadi. U oʻquvchi emas, yozuvchi edi.
Ruschadan
Habib SIDDIQ
tarjimasi
“Ijod olami”, 2017–5
https://saviya.uz/ijod/nasr/yozilmagan-asarlardan-parchalar/