VOLGOGRAD

VOLGOGRAD (1925 i. gacha Saritsin, 1961-y. ga qadar Stalingrad) — RF dagi shahar, Volgograd viloyatining markazi. Volga daryosining oʻng sohilida. Yirik daryo porti, aeroport bor. T. y. tuguni. Kema qatnaydigan Volga-Don kanalining boshlangʻich punkti. Aholisi 1005 ming kishi (1999). Shaxarga 1589-y. da asos solingan. 18-a. oxiriga qadar harbiy istehkom boʻlgan. 1942-y. iyulidan 1943-y. fev. gacha Volgogradda nemis qoʻshinlari bilan shiddatli janglar boʻlgan. Volgograd RFning yirik sanoat markazlaridan biri. Sanoatning yetakchi tarmoqlari: mashinasozlik va metallsozlik (traktorsozlik, kemasozlik, neft mashinasozligi, motorsozlik va b.), metallurgiya (alyuminiy, quvur, poʻlat sim-kanat z-dlari). Yogʻochsozlik, oziq-ovqat sanoati, qurilish materiallari i. ch., elektr energetika ham rivojlangan. Konserva, margarin, sut, pivo z-dlari, konditer f-kasi, goʻsht k-tlari, temir-beton, uysozlik z-dlari, yengil sanoat korxonalari (koʻn z-di, tikuvchilik f-kalari va b.) bor. Volgogradda 7 oliy oʻquv yurti (shu jumladan 3 un-t), 5 teatr, muzeylar (Mamay qoʻrgʻonidagi yodgorlik ansambli, oʻlkashunoslik muzeyi, tasviriy sanʼat muzeyi va b.), mavjud.