UMAROV Faxriddin Asilpoʻlat oʻgʻli (1926.1.9, Qibray tumani) — lirik xonanda va bastakor, Oʻzbekiston xalq hofizi (2002). Ilk musiqa saboqlarini otasidan, soʻng qofizlik sirlarini Asqar Ubaydullayev, Akmalxon va Boboxon Soʻfixonovlardan oʻrgangan. Toshkent konservatoriyasida taʼlim olgan (1950— 53). Oʻzbekiston radioqoʻmitasi (1946— 61), Oʻzbek davlat filarmoniyasi (1961 — 86)da yakkaxon xonanda. Repertuaridan, asosan, kuylarni oʻzi bastalagan qoʻshiq va ashulalar — «Ishqingda zor oʻldim» (Noqis gʻazali), «Naylaram» (Xislat), «Jamoling», «Sochining savdosi tushdi» (Bobur), «Onam derman» (Yo. Mirzo), «Qaydasan» (Mashrab), «Uzbegim» (E. Vohidov), «Ey, muhabbat» (P. Moʻmin), «Umr oʻtmoqsa» (T. Sulaymon), shuningdek, mumtoz («Chorgoh», «Bayot» kabi) va zamonaviy bastakorlar ashulalari («Munojot», «Sodirxon Ushshogʻi» va b.) oʻrin olgan. Ijrolari Oʻzbekiston radiosi fonojamgʻarmasiga, 20 dan ortiq gramplastinkaga yozilgan.
Ad.: Boqiy N., Hamidov H., Meni yod et, T., 2000.