Mititaka Yamada
TONG MANZARASI
Oltin qoʻngʻiz ivirlab,
Nozik qadam bosadi.
Nozli shamol shivirlab
Chorrahada esadi.
Har oʻtkinchi bariga,
Yenglariga ilashib…
Vaqt oʻtmoqda talashib…
Yangrab Shubert maqomi
Tong qoʻyniga oqadi.
Goʻyo tuman chulgʻagan
Olisni uygʻotadi.
Goʻyo tongning yuziga
Kuydan shuʼla purkaydi.
Goʻyo ufq labiga
Qizil boʻyoq surkaydi…
Yoʻl chetida mizgʻigan
Koʻm-koʻk, koʻm-koʻk – har yaproq
Goʻyo tong moʻjizasin
Koʻrmagandek hech bir choq
Hayron qolib koʻzini
Katta-katta ochadi.
Qushlar esa saldan soʻng
Shahar boʻylab uchadi.
Ammo shamol bulutning
Soqolini qirmoqda.
Bulut esa yolvorib
Unga izoh bermoqda:
“Quyosh yuzin toʻsmayman,
Chiqaversin bemalol…”
Yupqa kumush oq parda
Ufq betin oʻraydi.
Tomga qoʻngan bulutlar
Asta-asta eriydi.
Bulut – hurlik yalovi,
Yuksaklarda bilmas gʻov.
Boʻron uni parchalab
Tashlagandir beayov.
Endi oʻsha parchalar
Yer betiga qoʻnmoqda.
Naqshi koʻcha-koʻylarni
Bezab, porlab yonmoqda.
Goʻyo kafan boʻlib u
Sonsiz halok boʻlganlar,
Joni tirik qolganlar
Jasadini oʻraydi,
Oh-dodini oʻraydi…
Rahming kelsin, ey, davr!
Demak, yaqin fursatda
Koʻz yoshimni quritsang,
Koʻngil kular albatta!
DARYODAGI YILTILLAGAN YOʻL
Kumush boʻlib tovlanar bu yoʻl,
Chor atrofi tiniq, koʻm-koʻk suv.
Gar istasang, mayli, sayyoh boʻl,
Nur toʻshalgan bu yoʻllar suluv.
Suv ostidan tinglaysan har kun
Goho yigʻi, goh kulgi – nido,
Goh soyalar suhbatin sekin,
Goh quloqni yorgudek sado.
O, yorilib ketdimi daryo, –
Keldi oʻgʻlim tovushi, evoh!
… Suv ostida yashil yoʻllar bor,
Bu yoʻllarda qumlar hayajon
Zavqli qoʻshiq aytadi bedor…
Nahot kirdi soyalarga jon?
Nahot ular tirigu, hayot
Kamalaklar nurida oʻynar?
Suvdek moviy koʻzlari yonar?
Nahot buning bari xayolot?
Oq bulutlar – oppoq kaptarlar,
Vayronalar ustidan osha –
Uchishingiz qanday tomosha!..
Shuhrat tarjimalari
https://saviya.uz/ijod/nazm/tomga-qongan-bulutlar/