STUDIYA (ital. studio — oʻqish, oʻrganish) — 1) rassom yoki haykaltarosh ustaxonasi;
2) rassom yoki aktyorlar tayyorlaydigan maktab;
3) ijodiy faoliyat bilan bir qatorda sahna (yoki tasviriy) sanʼati asoslarini oʻrganadigan, asosan, yoshlardan tashkil topgan teatr (yoki rassomlar) jamoasi. Studiyaning professional va xavaskorlik turlari bor;
4) badiiy va b. filmlar yaratuvchi ijodiy va texnik kino xodimlari jamoasi;
5) radioeshittirish va telekoʻrsatuvlar olib boriladigan maxsus bino (radiostudiya, telestudiya);
6) ovoz yozish xonasi. Musiqiy asarlar ijrolarini elektr (magnitofon kabi) va elektron (sintezator va b.) vositalar yordamida yozib olib fonogramma tayyorlaydigan maxsus joy (mas, «Tarona rekorde» S. si va b.).