Тиббиётимизда кун сайин янгиланишлар рўй бериб, ўзгаришлар сари муҳим қадамлар қўйилмоқда. Қилинажак ишлар кўп, соҳа тараққиётига оид илмий-амалий изланишлар янада кучайтирилмоқда. Ҳукуматимиз томонидан чиқарилаётган қатор фармон ва қарорлар мазмунида ҳам бу ўз аксини топаётир.
Президентимизнинг “Ўзбекистон Республикаси аҳолисига 2017-2021 йилларда ихтисослаштирилган тиббий ёрдам кўрсатишни янада ривожлантириш чора-тадбирлари тўғрисида”ги қарорида (2017 йил 20 июнь) ихтисослаштирилган тиббий ёрдамнинг замонавий талабларга жавоб берадиган самарали тизимини янада шакллантириш, профилактика ва касалликларни аниқлаш чораларини такомиллаштириш, аҳолига, шу жумладан минтақаларда юқори малакали тиббий ёрдам кўрсатишнинг натижадорлиги, сифати ва ундан фойдаланишни тубдан оширишга оид муҳим вазифалар белгиланган. Хусусан, даволашнинг замонавий усулларини жорий этиш лозимлиги ҳам айтилган.
Қарорда белгиланган вазифалар асосида ишларимиз режаси кун тартибидаги асосий масалалар қаторига киритилди. Марказимизда бундан кейин ҳам касалликларни даволашда илғор усуллар, юқори технологиялар ва ибратли тажрибаларга таяниб иш кўрилади. Шу ўринда айтиш жоизки, Марказ қошидаги “Оила ва никоҳ” маслаҳат поликлиникасида аёллардаги яллиғланиш касалликлари тезкорлик билан аниқланмоқда.
Жинсий йўл билан юқадиган касалликларни аниқ ташхислаш учун, дунёда энг замонавий ҳисобланган усуллардан бири (ПЦР – real time), яъни микроблар ДНКсини аниқлаш йўлга қўйилди. Бу текширув давомида жинсий аъзолардан суртма олинади ва хламидия, уреаплазма, микоплазма, одам папиллома вируси, генитал герпес каби инфекциялар аниқланиб, керакли даво муолажалари буюрилади.
Бундан ташқари, кўп йиллар давомида кўлланилиб келаётган ИФА усулида қонда TORCH инфекцияларни аниқлаш, бактериологик суртмани экиш орқали антибиотикларга сезувчанлигини аниқлаш текширувлари ўтказилади. Барча келин-куёвлар маслаҳатхонага бепуштлик туфайли мурожаат қилишганда, албатта эркаклар спермограмма ва шунга ўхшаш керакли таҳлилларни топширишади. Текширувлар ва таҳлиллар ўтказилиб бўлгандан сўнг, бепуштликнинг аниқ ташҳиси қўйилади. Консерватив ёки зарур ҳолларда жарроҳлик муолажалари буюрилади. Бемор энг замонавий жарроҳлик усуллари (гистероскопия, лапароскопия, консерватив миомэктомия, лапаротомия) билан даволанади.
Марказда “Болалар гинекологияси” бўлими ҳам мавжуд. Болалар гинекологи мутахассислари Тошкент педиатрия тиббиёт институтининг акушерлик ва гинекология кафедраси томонидан клиник ординатура орқали тайёрланади. Жойларда бирламчи тизим шохобчаларида фарзанд кўриш ёшидаги аёллар ҳамда ўсмир қизлар билан алоҳида йўналишда иш олиб боришга янада кўпроқ эътибор қаратилмоқда.
Репродуктив саломатлик, туғруқлар орасидаги интервални сақлаш, контрацептив (ҳомиладорликнинг олдини олувчи) воситалардан фойдаланиш, ҳомиладорлик даврини меъёрида ташкил қилиш, бу вақтда тиббий кўрикдан тез-тез ўтиш, чақалоқ туғилиши билан уни ҳисобга олиш, ёш даврига кўра уни турли касалликларга қарши эмлаш ушбу йўналишнинг асосий мазмунини ташкил этади.
Марказимизда кўкрак сути билан боқиш бўйича жорий қилинган қоидаларга қатъий амал қилинади, тарғибот ишлари кенг кўламда амалга оширилаяпти, кўкрак сути билан боқишнинг муҳим томонлари туққан аёлларга мунтазам тушунтириб борилади. Кузатишлар натижаси шуни кўрсатадики, она сути билан парваришланган болалар сунъий озиқ билан боқилган гўдакларга нисбатан ҳам жисмонан, ҳам ақлан яхши ривожланадилар.
Она ва фарзанд саломатлиги жамият келажаги учун муҳим ўрин тутади. Демак, миллат саломатлигини ҳам соғлом насллар белгилайди. Шундай экан, дунёга келган ҳар бир болани нафақат оиланинг, балки наслнинг муносиб давомчиси, давлатимизнинг муносиб эгаси, миллатимизнинг эса соғлом вориси қилиб улғайтириш лозим.
Дилбар НАЖМУТДИНОВА,
Республика ихтисослаштирилган
акушерлик ва гинекология илмий-амалий
тиббиёт маркази акциядорлик жамияти
бош директори.