* halovat
Har tong
oʻn ikki soatni
oʻn ikki soʻm kabi
hamyonimga solib joʻnayman
kechqurunga besh-olti soatlik
halovatli uyqu olib qaytgani.
* keksalik eshigidagi yozuv
Yoshlikning
xatolari bilan
kirmoq erur manʼ.
Bunda ham
nuqson koʻp
senga atalgan…
*
Aslida
asliyat ham – tarjima.
Qalb,
Tafakkur,
Ruh
tarjimasi.
*
Bir oyoqli
simyogʻoch
uch oyoqda turib
uni xoʻrlayotgan
daydi itga
boqdi achinib…
* ochun
Texnika
odamning oʻrnini
egallamoqda
odamiylik oʻrni esa
boʻsh qolmoqda
koʻpincha…
* istiqbol
Biologik tarzdan
elektron shaklga
oʻtar boʻlsa bashar hayoti –
sheʼr bitarmi, qiziq,
elektromagnit qalbli
biron avlodim?..
*
Gugurtchoʻpday
boshimda
balolar boʻldiki jam,
jahonimni oʻt olgay
dunyoga
tegib ketsam.
* hikmat
Dunyo doʻkonidan
keraksiz molni
olaverdim urho-ur.
Endi magʻrur bisotimni ham
sotib yubormoqqa
men majbur…
* etakchilik yuki
Turnalar olisga uchgan chogʻ
yurtlardan yurtlarga koʻchgan chogʻ
solishadi koʻkda argʻimchoq –
kuch-quvvatin tejarlar shundoq.
Ammo, eng koʻp qanot qoqarmish
Parvoz payti toʻdaboshi qush.
*
Bugun
odam –
odam emas,
odam – atom
(boʻlinmas va
boʻlishmas oʻzgalarga).
* tilak
soʻzga chiqqaningda – zabon
ovga chiqqaningda – kamon
yoʻlga chiqqaningda – karvon
elga chiqqaningda – imon
pand bermasin
hech qachon!
*
Yor.
Yot.
Yov.
Birgina tovush bilan
yaqin yoki
yiroqmiz darrov.
* taqdir
Boshida aylangan
qancha-qancha
tegirmon toshlari
un boʻlib ketganiga
hali-hamon hayron
shu uvoq bir don.
* maniken
Muhtasham doʻkondagi
zarhal oyna ortidan
oʻshshaygan bu poʻrimga
jon ham ato etilsa –
“tomoshaqovoq”ligidan
boʻlardi-da xoʻb izza.
* arz
Vujud bilan olishdim qirq yil:
Ichsa xarob qiladiganni ichirdim,
Yesa azob beradiganni yedirdim.
Bu yogʻiga tan chiqdi epchil:
Ichish mumkin boʻlmaganni ichirgay,
Yeyish mumkin boʻlmaganni yedirgay.
* tuyuq
Koʻngilga
ayriliq dogʻi
dogʻ solar dogʻi va dogʻi
qachon
visol avvali-yu
bu hajrning adogʻi?
* bahsning davomi
Bahsimizdan
tugʻilgan
haqiqatning
otasi
senmi
yo men?..
*
Rafiqam
taxlaydi sandiqqa
ustma-ust
yozgi kiyimlaru
issiq kunlar
halovatini.
* Mahmud Koshgʻariy
Nomusing kamzuliga
til bilan qadalgan
tuhmat tugmachasin
tishlab
echolmaysan,
uzolmaysan ham…
* jaholat
“BIZ – TOʻGʻRIMIZ!”, deb
Tom baravar shior yozdilar
lekin
mualliflardan biri
“T” harfini
oʻmarib ketdi sekin.
* riyokorlik
Qaychi
ogʻushini
qancha
keng ochar –
demak kesmoqligi
shuncha muqarrar.
* luqmai halol
Yoʻlakdagi hakka
choʻchimadi-uchmadi,
aksincha, taʼnali tikildi tikka.
Uning chala chaqilgan yongʻoqlarin
shu yoʻlakdan olgandim terib
yigirma yilcha burun…
* shafoat
Bir kuni saharda
sohilga kelib
hasad, gina, arazlarni
oqizib yubordim
shafoat qayigʻiga solib
va ortimga qaytdim baxtiyor, gʻolib.
* eshik qoʻngʻirogʻi
Bu cholgʻuda
hamma
faqat
bitta kuyni
chalgani –
chalgan.
* nafosat
Goʻyo suv sathiga
oyoq qoʻygandek
bir ohista qadam bosar ul.
Nazarimda hozir, shu lahza –
tuflisin uchidan
halqa-halqa yoyiladi yoʻl.
*
Yomgʻir tugar
Yogʻdu ham tark etar falakni
tabiat
ranglarga boʻlaklab, tugar
va asrab qoʻyar kamalakni
keyingi galga.
* taʼsir
Manzilingni soʻrar edim
ilkimda qoʻltelefon –
oʻrtamizga tushdi qulab
manzilidan chalgʻigan
ari shoʻrlik
nogahon.
*
Samodagi
Yulduzlarning
olis haroratidan emas,
sunʼiy yoʻldoshlarning
yaqin nazoratidan
baʼzan qisadi nafas…
*
Raqamlar asrida
raqamli texnika
sehridan sarmast
“raqam”lashaverib
soʻzlashishni
unutmasak bas…
* faxr
Samarqand. Yulduzli oqshom.
Samoda yangi (eski) oy.
Navoiy, Ulugʻbek yo Temur bobom
qachondir shu oyga boqqan hoynahoy
men turgan manzildan
mendek mahliyo.
*
Umr borho kam qoliptur.
Umr – chindan ham qoliptur.
Oʻzni sigʻdirmoq-chun qolipga
Boshdan boshladik, oxir –
Qoliptur oyoqlar sigʻmay,
Bosh ham qoliptur!..
* sogʻinch
Hali
qish ham
boshlanmay turib
koʻrgim keldi yana bahorni
uch oyga pattalar
oldim oldindan.
* imkonsizlik
Har bir daqiqa –
oltmishta mix qoqilgan
eshik.
Qayta ochay desang
qancha eshiklaring
yana berk…
* taʼrif
Palakka ochilgan
suv bilan
serob
semizoʻtdek
orsiz, tekinxoʻr
janob…
*
Kuyadori hidi…
gʻijimlik…
uniqish…
eski paltomga ham
malol keldi
qish.
*
Qancha davom etar
bilmam
sevgi degan
yangi tush
rangli tush
ohangli tush!..
* shubha
Xotira
nainki odamda,
kompyuterda ham bor.
Lekin qalbni
mikrochipga koʻchirish –
eh-hey, dushvor ish…
*
Istayman
istaklarimni.
Lek
istaklar
istasa –
netay…
* tarbiya
Bandadan
najot kutar
dilbandi.
Afsuski
banda – band
banda – bandi.
* gazetada xato ketgan
raqamlar
Siz – oshkora pinhonim
va qiynalgan vijdonim
ochiq qolgan tovonim
gumonimu pushmonim
yomonlardan yomonim
dushmanim…
*
Xotira diktofoni –
eng dahshatli qurol.
necha kunki
xato ketgan soʻzlarimni
takrorlab
pushaymondan oʻldirdi meni.
*
Parishon
qush misol
har nafasimni
qalbni
sovutmoqqa
sarflayman (uvol)…
Gʻulom MIRZO
“Yoshlik”, 2011 yil, 8-son
https://saviya.uz/ijod/nazm/shashqator-nomlar/