Alisher Navoiyning soʻnggi asari – “Mahbub ul-qulub” buyuk mutafakkirning umri davomida toʻplagan tajribasi, koʻrgan-kechirganlari haqidagi xulosasidir. Undagi hikmatlar bugun ham oʻz qiymatini zarracha yoʻqotmagani bilan eʼtiborli.
***
Odil podsho quyosh bilan bahor yomgʻiridek qora tuproqdan gullar ochadi va mamlakat xalqi boshiga oltin bilan durlar sochadi.
***
Mudarris – mansab va amaldorlikka qiziqmasligi, oʻzi bilmaydigan ilmdan dars berishga urinmasligi, maqtanchoqlik uchun madrasa ayvonining toʻrini egallamasligi lozim.
***
Tabobat fanidan savodsiz tabib xuddi jallodning shogirdi kabidir.
***
Yaxshi xotin – oilaning davlati va baxti. Husnli boʻlsa – koʻngul yozigʻi, xushmuomala boʻlsa – jon ozigʻidir.
***
Qanoat – bir chashmadirki, olgan bilan uning suvi qurimaydi: u bir xazinadirki, undagi boylik sochilgan bilan kamaymaydi. Har kim qanoatga odatlangan boʻlsa, shohlik-gadolik tashvishini bilmaydi.
***
Sabr achchiq, ammo foyda beruvchi: u – qattiq, ammo ziyon-zahmatni daf etuvchi.
Sabr – shodliklar kalitidir.
***
Eshitmoq kishini boyitadi,
Koʻp gapirmoq – sayozlatadi.
***
Insoniyat bogʻining eng goʻzal daraxti ehsondir.
***
Ogʻziga kelganin demoq – nodonning ishi va oldiga qoʻyganin yemoq – hayvonning ishi.
***
Bilmaganin soʻrab oʻrgangan – olim, orlanib soʻramagan – oʻziga zolim.
***
Oz-oz oʻrganib – dono boʻlur,
Qatra-qatra yigʻilib – daryo boʻlur.
***
Sihat tilasang – koʻp yema,
Izzat tilasang – koʻp dema.
***
Oz gapirgan – oz yanglishadi.
Boʻston RAHMONOVA tayyorladi.
https://saviya.uz/ijod/nasr/oz-gapirgan-oz-yanglishadi/