GOLL

GOLL (Gaulle) Sharl de (1890.22.11, Lill — 1970.9.11, Kolombele Dyoz-Egliz) — Fransiya prezidenti (1959 — 69). 1940-y. Londonda antigitlerchilar koalitsiyasiga qoʻshilgan. «Ozod Fransiya» (1942-y. dan «Kurashayotgan Fransiya») vatanparvarlik harakatiga, 1941-y. esa «Fransiya milliy qoʻmitasi»ga asos solgan. 1943-y. Jazoirda tuzilgan «Fransiyani ozod qilish milliy qoʻmitasi»ga rahbar boʻlgan. 1944-y. iyunda Goll bu qoʻmitani Fransiya Respublikasining Muvaqqat hukumatiga aylantirgan. Fransiya Muvaqqat hukumati boshligʻi (1944—46 y. yanv.). Urushdan soʻng «Fransuz xalqini birlashtirish» partiyasi tashkilotchisi va rahbari. 1958-y. Fransiya bosh vaziri. Gollning tashabbusi bilan prezident huquqini kengaytiruvchi yangi konstitutsiya tayyorlangan (1958). Uning prezidentligi davrida Fransiya oʻzining yadroviy kurolini barpo etish rejalarini amalga oshirgan, NATO harbiy tashkilotidan chiqqan.