AMALIY AGROELEKTRONIKA

AMALIY AGROELEKTRONIKA — fan va texnikaning maxsus elektron qurilmalar, tizimlar va elektron hisoblash texnikasini yaratish, ularni q. x. ishlab chiqarishida qoʻllash bilan shugʻullanadigan yoʻnalishi. Asosiy vazifalari: tuproqning fizik-kimyoviy va mexanik koʻrsatkichlarini kuzatuvchi mikroelektron qurilmalarni turli maqsadlarga moʻljallangan yangi mikroelektron texnikani yaratish va ulardan dehqonchilikda foydalanish; aerokosmik usullardan q. x. da foydalanish; dehqonchilik mahsulotlarining sifatini oshirishga oid agrostandartlarni tuzish; q. x. ni toʻla kompyuterlash va axborotlashtirish va b. Kompyuterlar va maxsus mikroelektron qurilmalarni q. x. da qoʻllash ekinlar hosildorligi va ish unumdorligini oshirishga, sifat koʻrsatkichlarini yaxshilashga imkon beradi, suv va energiya tejaladi.