ABDULLOH ANSORIY MAQBARASI

ABDULLOH ANSORIY MAQBARASI — Hirot (Afgʻoniston) dagi meʼmoriy yodgorlik (1425—29) va mashhur ziyoratgoh. Hazira — maqbara atrofi 30 hujra — xilxona bilan oʻralgan, oldida baland peshtoq. Hujralar gumbaz tomli, ularda asosan, temuriylar avlodi — Hirot hukmdorlarining qabrlari boʻlib, oq, qora marmar qabrtoshlar oʻrnatilgan. Ansoriy qabri ustiga keyinchalik Bobur oq marmardan yodgorlik (bal. 7,5 m) oʻrnattirgan (saqlanmagan). Xona bezagida sirlangan gʻisht, parchin va marmar, girih naqshlari ishlangan, kufiy uslubda xatlar bitilgan.