Mehru shafqat shevasin tutgil

 Boʻlmagil

Har balo boʻl, mayli, lekin

toru mahdud boʻlmagil,

Oʻzgalarga masxara,

nodonu chulchit boʻlmagil.

Mayli, boʻztoʻrgʻay boʻlib,

koʻklarga parvoz et, vale,

Yerni koʻrmas koʻz ila

osmonda burgut boʻlmagil.

Ey koʻngil, xirmonda don boʻl,

boʻlma sargʻaygan somon,

Sovrilib yellarda bir kun

nestu nobud boʻlmagil.

Kamtarinlik bobida

tuproq boʻlishni qil havas,

Bazm aro zarrin kamarbandlarda

yoqut boʻlmagil.

Begʻubor oʻt boʻl jahonda,

ayla ravshanlik shior,

Ustuvor etma qarolikni,

qaro dud boʻlmagil.

Odamiydirsan shu olam

ichrakim, boʻl odamiy,

Ikki olamga razil

shaytoni mardud boʻlmagil.

Doʻstu ulfat boʻl mudom

farzonalarga, ey Jamol,

Yaxshilarning yonidin

bir lahza soqit boʻlmagil.

Tabassumingdin

(“Dugoh” yoʻlida)

Tabassumingdin gul ochib

fasli bahor bugun,

Olam koʻzimga boshdin-oyoq

lolazor bugun.

Hayrat ulashdi tabassuming

elga, ey nigor,

Bizdek gʻarib, bechoralar ham

baxtiyor bugun.

Zavqu safodin shu yorugʻ

olamda bor esa,

Har nechakim savtu sado,

bagʻrimda bor bugun.

Tabassuming koʻrgan kishida

bormi ixtiyor,

Yigʻlarmanam, kularmanam

beixtiyor bugun.

Tabassumingdanmi magar

taraldi shuʼlalar,

Koʻngil koʻzgusidek koʻk ham

begʻubor bugun.

Tabassuming koʻngillarni

beqaror aylasa,

Mening jonimdadir hama

azmu qaror bugun.

Azmu qaror ulki, seni

sevarman toabad,

Aytmoq Jamolga ishqini

iftixor bugun.

Soqiynoma

(“Dilxiroj” yoʻlida)

Soqiyo, tutgil qadahkim,

bori gulrangu safo,

Yorning shirin labi ermish

menga umri baqo.

Yor jamolini koʻrarda

zoru mushtoq boʻlmasa,

Tutganing gulgun qadah

oshiqqa boʻlgaymu ravo?

Ey koʻngil, oʻksinma, yoring

aylasa qahru itob,

Yordin mehru muruvvatdir

senga jabru jafo.

Yetmagay umrim, visoliga

etolmasman, dema,

Intiho yetganda umringga,

etishgay ibtido.

Oshiq ulkim, yor bedod etsa,

parvo aylamas,

“Boʻlgay ul jondin judo,

boʻlguncha jonondin judo”.

Ey bashar, yodingda tutgil,

ne emish husni sharaf,

Bandalik etsang, xudolikni

senga etgay xudo…

Soqiyo, tutgil qadahkim,

sipqorib joming Jamol,

Yor deb qoʻysin qadamni

vodiyi vahdat aro.

Behisob deb oʻylama

Sen savol berding amal aylab, javob boʻlgay senga,

Yo gunoh kelgay amaldin, yo savob boʻlgay senga,

Yo qoʻnar boshingga baxt, yo iztirob boʻlgay senga,

Behisob deb oʻylama, bir kun hisob boʻlgay senga,

Yoki zulmat boʻlgusi, yo oftob boʻlgay senga.

Kibru manmanlikni qoʻy, tarki jaholat aylagil,

Mehru shafqat shevasin tutgil, adolat aylagil,

Himmating birlan raqiblarni xijolat aylagil,

Behisob deb oʻylama, bir kun hisob boʻlgay senga,

Ul hisobing yeru koʻkdin mustajob boʻlgay senga.

Oqibat daryo emas, koʻlmakliging yodingda tut,

Jon berib, taslim boʻlib, oʻlmakliging yodingda tut,

Boʻl qaro tuproq desa, boʻlmakliging yodingda tut,

Behisob deb oʻylama, bir kun hisob boʻlgay senga,

Yo karam boʻlgay va yo qahru itob boʻlgay senga.

Soʻzlagan yolgʻon soʻzingga soʻzlaring isyon etar,

Toʻymagan och koʻzlaringga koʻzlaring isyon etar,

Atlasu kimxoblaringga boʻzlaring isyon etar,

Behisob deb oʻylama, bir kun hisob boʻlgay senga,

Qoʻzgʻalur ruhingda mahshar, inqilob boʻlgay senga.

Ey Jamol, nafsi baloyingdin baland maʼvoda boʻl,

Tan ila dunyoni siyla, jon ila uqboda boʻl,

Har qadam qoʻysang, hamisha hoziru omoda boʻl,

Behisob deb oʻylama, roʻzi hisob boʻlgay senga,

Oʻng taraf yo soʻl tarafdin bir kitob boʻlgay senga.

Navoiy gʻazaliga muxammas

Ey musulmonlar, diyonatni xudodin istangiz,

Yaxshilikni yaxshidin, xayri duodin istangiz,

Benavolik boisin makru riyodin istangiz,

Istaganlar bizni sahroyi balodin istangiz,

Vodiyi hijron ila dashti fanodin istangiz.

Oftob zolim, shamol bedodgar ul vodiy aro,

Oshiq ahli chun iqomat aylar ul vodiy aro,

Oʻtsangiz nogoh shitob aylab gar ul vodiy aro,

Vomiqu, Farhodu Majnundeklar ul vodiy aro,

Boʻlsalar paydo, meni ham ul arodin istangiz.

Men nechuk koʻnmay oʻshal baxtimga tushgan hissaga,

Men ishongum joni zorimga, ishonmam jussaga,

Ey birodarlar, tavajjuh aylangiz bu qissaga,

Yuz alarning ishqicha dardu balovu gʻussaga,

Tolib el boshiga kelgan mojarodin istangiz.

Uzmadim koʻngilni bir lahza falakning oyidin,

Ne mashaqqatlarda kechdim dahru dunyo soyidin,

Oqibat qoldim oyogʻimni uzolmay loyidin,

Eyki, istarsiz savodulvajh¹ fiddoroyidin

Boxabar boʻlmoq, meni yuzi qarodin istangiz.

Men bugun soʻylay nechuk, ey yor, ishqim sharhini,

Soʻylasin olamga shu ashʼor ishqim sharhini,

Bogʻ aro bulbul etar takror ishqim sharhini,

Koʻnglim ul zulf ichradir, zinhor ishqim sharhini,

Istamang men telbadin, ul mubtalodin istangiz.

Demangiz, yolgʻiz navo uzra qilur kotib raqam,

Yo magar savtu sado uzra qilur kotib raqam,

Har safar jabru jafo uzra qilur kotib raqam,

Nuqta yangligʻkim, vafo uzra qilur kotib raqam,

Ishq oʻtining dogʻini ahli vafodin istangiz.

Oshigʻi devonalarkim oʻtdi, oni istar el,

Navbati davron Jamolga yetdi, oni istar el,

Yor jamoliga muxammas bitdi, oni istar el,

Ogʻzi shavqidin Navoiy yitti, oni istar el,

Yo adam dashtida, yo mulki fanodin istangiz.

Jamol KAMOL,

Oʻzbekiston xalq shoiri

“Sharq yulduzi”, 2012–2