Toshkent televizion minorasi

Post Views:
520

Toshkent televizion minorasi (Amir Temur shohko‘chasi, 109) – radiotelevizion uzatish stansiyasi, me’moriy inshoot. Toshkentdagi 1-teleminora metall fermalardan (balandligi 180 m) qurilgan (1956 yil, Navoiy ko‘chasi, 69). Teleko‘rsatuvlar ko‘lamining kengayishi munosabati bilan kuchli radio-televizion uzatish stansiyasi qurilishiga ehtiyoj tug‘ilgach, Bo‘zsuv kanalining o‘ng sohilida 1978–85 yillarda balandligi 375 m li 2-Toshkent teleminorasi qurildi (me’morlari: Yu.Semashko, N.Terziyev-Sarukov; muhandislar: Ye.Morozov, M.Musheyev).

O‘zagi 3 konussimon qurilma tirgakka o‘rnatilgan. Toshkent teleminorasida «Koinot» restoranining «alvon» va «moviy» zallari (180 o‘rinli) (kuzatuv) maydonchalari, teleminora foyesida Butunjahon buyuk minoralar federatsiyasiga bag‘ishlangan muzey bor (balandligi 100 m). 220 m balandlikda radio-televizion stansiyasi qurilgan.

Minora o‘rtasida lift, zina, yordamchi xonalar, meteorologik stansiya va muhandislik jihozlari joylashgan. Eng yuqori qismida 5 dasturli ko‘rsatuvlarga mo‘ljallangan antenna o‘rnatilgan. Minora ichki bezagi yechimida milliy uslublardan foydalanilgan.

«Toshkent» ensiklopediyasi. 2009 yil