Yondaftardan

Hayot magnit – oʻziga tortadi, yozuvchi shu magnitni oʻziga yuqtira olsagina kitobxonni oʻziga torta oladi.

* * *

Yaxshi yozolmaganingni kechirish mumkin, lekin yaxshi yozishni istamaganingni kechirish mumkin emas.

* * *

Mening bir qarindoshim bor, yozuvchi bґlish uchun ilmi ham, layoqati ham boʻlmagani holda, yozuvchilikka havas qiladi; ilmi borligini, boshqa odamlarga qaraganda adabiyotga yaqin ekanini koʻrsatish uchun hamma yerda «P» oʻrniga «F» ishlatadi.

* * *

Kishining bir gʻoyaga sadoqati tanlagan kasbi-hunari bilan shu gʻoyaga qay darajada yaxshi va koʻproq xizmat qilgani, qilayotgani bilan oʻlchanadi.

* * *

Adabiyot atomdan kuchli, lekin uning kuchini oʻtin yorishga sarf qilish kerak emas.

* * *

Sergap, ezma odamni suhbatda izza qilish, sergap, ezma notiqa «qisqaroq boʻlsin!» deb soʻz tashlash kifoya, lekin sergap, ezma yozuvchini albatta sudga berish kerak.

* * *

Mikrob qanchalik xavfli boʻlsa, uni shunchalik katta qilib koʻrsatadigan mikroskop kerak. Satira oʻtiga uchragan kishi, vijdoni boʻlsa, odamlarning yuziga qarolmaydi, vijdoni boʻlmasa, ogʻzidan koʻpik sochib, yozuvchining ketidan bolta koʻtarib yuguradi.

* * *

Adabiyot hunar, uni kasbga aylantirib olgan yozuvchi olmaga tushgan qurtdan farq qilmaydi.

* * *

Adabiy asar yozish uchun, hech shubhasiz, talant kerak. Lekin yozilgan narsani oʻchirish, kitobxonga zarur gaplarnigina qoldirish uchun talantning oʻzigina kifoya qilmaydi, insof ham kerak.

Abdulla QAHHOR