Yoʻlni burdim togʻ tomon

 Icciqxona

Tashqarida qor, ayoz

Ich-ichidan gʻuvlaydi.

Ichkarida xuddi yoz

Pomidorlar gullaydi.

Tashqarida bolalar

Otar shodon yaxmalak.

Bu yerda tugib yotar

Bodringlar otib palak.

Tashqarida oqqan suv

Kechga borib muzlaydi.

Ichkarida kapalak

Gul aro vizillaydi.

Tashqarida qahraton

Qish hukmini oʻtkazar.

Ichkarida parcha yer

Elga neʼmat tutqazar.

Yurtimiz koʻp ajoyib,

Toʻrt faslga egadir.

Dehqon bobo qishda ham

Bekor yotmas negadir.

Tashqarida qor, ayoz,

Ichkari issiqxona.

Yam-yashildir parcha yer,

Judayam qiziq xona.

Tipratikon

Oʻt-oʻlan maydonida

Pildiraysan, chopasan.

Namuncha oshiqmasang,

Aytgin, kimdan xafasan?

Uychang qayerda, aytgin,

Kim yaraydi kuningga?

Nega oʻranib olding

Tikanakli toʻningga?

Boshqa koʻylaging yoʻqmi,

Bu ishing boʻlmas oqlab?

Onang seni erkalar

Qanday oʻpib, quchoqlab?

Soʻqmoq

Yoʻlni burdim togʻ tomon,

Yoʻlamay deb yomonga.

Buralgancha ey soʻqmoq

Boshlading qay tomonga?

Qiya chiqdi oldimdan,

Qandayin tegingayman?

Otimdan tushib sekin

Ortimga chekingayman.

Yoʻlni burdim soy tomon,

Yoʻlamay deb yomonga.

Buralgancha ey soʻqmoq

Boshlading qay tomonga?

Jarlik chiqdi oldimdan,

Men qanday tegingayman?

Tushib sekin otimdan,

Ortimga chekingayman.

Yoʻlni burdim vodiyga,

Yoʻlamay deb yomonga.

Qayga yoʻqolding, soʻqmoq,

Javob bergin savolga?

Nido keldi samodan:

– Netding zahmatdan qochib?

Axir, sen ham yashab koʻr,

Yangi soʻqmoq – yoʻl ochib.

Hayot – abadiy soʻqmoq,

Sinar bizni soʻqmoqlar.

Yomgʻirdan qochib doʻlga

Tutilarkan ahmoqlar.

Qushlar tili

“Chirq-chirq” etadi chumchuq,

“Ku-ku”laydi musicha.

Shaqillab olashaqshaq

Kuylardi bilganicha.

Hoʻv, terakning uchiga

Qoʻnib olgancha mayna,

Qaysi qushning tilida

Uni qilmoqda mayna.

Qora toʻnli qargʻavoy

Shudgor uzra “qagʻ-qagʻ”, der.

Ayni koʻklam chogʻida

Qaydam, qorni yogʻ-yogʻ, der.

Qushlar koʻz-koʻz qilishar

Ovozini, husnini.

Qoyil qoladir kakku

Takrorlab oʻz ismini.

Toʻrqovoqda bedana,

Zorlanadi:

“ – Pitpildiq.

Yayrardik bedazorda,

Endi toʻrga tutildik!”

Chamanni etib oshyon

Rozin aytgancha gulga,

Shoʻx-shodon sayrar ekan,

Maftun boʻldik bulbulga.

Biri mahzun, biri shod

Sayrashadi qushchalar.

Oʻz tilida chugʻurlab

Yayrashadi qushchalar.

Sayrashadi, sayramoq

Ixtiyori qoʻlida.

Oʻz fikrin aytishmoqda

Ular oʻzin tilida.

Neʼmat DUSHAYEV

“Sharq yulduzi”, 2017–1