Xizmatdosh doʻstlarimga

Bir xil yur, deb uqtirar serjant,

Bir xil tur, deb uqtirar serjant.

Uxlar boʻlsang, tushlaringni ham

Bir xil koʻr, deb uqtirar serjant.

Bir xil tushmas ammo negadir,

Poyma-poydir qadamlarimiz.

Kimdir safdan qolib ketadi,

Oʻzib ketar ildamlarimiz.

Bir haftami, oʻn kunmi oʻtgach,

Izga tusha boshlar hammasi.

Tarbiyalar bizlarni chanqash

Va toshyoʻlning oʻtdek nafasi.

Hayotda-chi, ammo hayotda

Teng tushmaydi aslo odimlar.

Kimlar qolib ketadi ortda,

Ilgarilab ketadi kimlar.

Buni oʻnglab boʻlmaydi hargiz,

Har kim qoʻldan kelgancha yashar.

Lekin, doʻstlar, shu yurt uchun biz

Bir umrga askarmiz, askar.

Mayli, turfa kechsin kunimiz,

Har xil boʻlsin bizda quvonch, dard.

Ammo shu el, shu Vatanni biz

Birday halol sevmogʻimiz shart!

Orif Tolib

2013