Xayrlashuv

Qutlugʻ boʻlsin toʻylari,

Yarashibdi boʻylari.

Maʼyus tortgan bu qizning

Koʻpdir orzu-oʻylari.

Koʻzga yoshlar tizmasin,

Yoridan koʻz uzmasin,

Yana koʻnglin buzmasin

Yor-yorlarning kuylari.

Turli ipak, iplarga,

Sandiq-sandiq seplarga,

Faqat yaxshi gaplarga

Toʻlsin yangi uylari.

Koʻzi moʻltirab turgan,

Tunda yaltirab turgan,

Semirsin kuyov bergan

Qora qoʻchqor, qoʻylari.

Baxtga toʻlaversinlar,

Xursand boʻlaversinlar,

Endi kulaversinlar,

Ochilsin chiroylari.

Otangiz koʻkrak kerib,

Maqtansin tomoq yirib.

Qizini boyga berib

Oshdi-ku obroʻylari.

Yaxshi qiz, yaxshi boring,

Bizni esdan chiqaring.

Uzr, agar sheʼrimning

Botsa u-bu joylari.

Endi yurmang koʻchamda,

Endi turmang koʻchamda.

Koʻnglim buzmasin yana

Atringizning boʻylari.

Orif Tolib

2011