Taʼlim berish – umid urugʻini ekish demakdir

Lui ARAGON hikmatlaridan

• Agar koʻksimni tilsangiz, u yerdan Parijni topasiz.
• Adabiyot mamlakat uchun juda muhimdir, mohiyatiga koʻra, uning yuzi deyish mumkin.
• Ajoyib kechalarning birida kelajak oʻtmish deb nom oladi. Bu payt ortingga qaraysanda, olislayotgan yoshligingni koʻrasan.
• Baʼzida gʻolib boʻlish uchun chekinishga, qoʻlga kiritganingdan voz kechishga toʻgʻri keladi.
• Biz koʻpincha yoʻq joydan muammolar oʻylab topamiz.
• Davrimizning ziyonati yorqin shoirlardir. Angliyada – Kipling, Fransiyada Apolliner va Elyuar, Germaniyada Rilke, Rossiyada – Mayakovskiy va Yesenin, Armanistonda – Charens va Isaakyan. Bu mayoqlar bir-bir soʻnganda goʻyo dunyo zulmatga choʻmganday boʻldi.
• Dunyo yolgʻonchi guvohlarga toʻla.
• Yoshlar orzu qiladi. Qarilar eslaydi.
• Quyosh hamisha ishqibozlarining koʻzini qamashtirgan.
• Men bu kitobni ikkita bir-biriga oʻxshamaydigan davrni qiyoslab boʻlmasligini koʻrsatish uchun yozdim. Oʻtmishni bugungi kundan kelib muhokama qilish yoki izohlashdan koʻra johilona ish yoʻq.
• Odam nimadan hayratlansa, oʻshani koʻngliga yaqin oladi.
• Odamlar koʻpincha oʻzlarining vaqtinchalik baxtsizliklarini dunyodagi eng muhim narsa deb hisoblaydilar.
• Optimizm buyuk kishilarning ziynatidir.
• Rashk bu – jon joyingga toʻxtov bilmay sanchilayotgan ignadir.
• Tanqid muddatsiz surgundir.
• Taʼlim berish – umid urugʻini ekish demakdir.
• Toʻgʻrilik koʻpincha muhokama qilinmaydi.
• Faqat mehnatgina insonning qiyofasini oʻzgartira oladi.
• Hayotda hech bir narsa biz tasavvur qilgandek boʻlmaydi.

Rus tilidan Orif Tolib tarjimasi

“Yoshlik”, 2017 yil 10-son