SHPRIS (nem.) — tibbiy asbob. Organizmga turli dori eritmalari yuborish (inyeksiya), boʻshliklardan (plevra va boshqalar) suyuqliklar (qon, yiring) ni soʻrib olish va boshqalar muolajalarda ishlatiladi.
Shpris oʻlchami aniq koʻrsatilgan, dori eritmalarini dozalarga boʻlishga imkon beradigan silindrdan, porshen va ichi kovak ignadan iborat. Hozir bir marta ishlatiladigan Shprislar keng rusum boʻlgan. Bu turli kasalliklar yuqishi va tarqalishining oldini olish imkonini beradi.