QARSHI MAGISTRAL KANALI

QARSHI MAGISTRAL KANALI — Qarshi choʻliga qurilgan irrigatsiya inshooti. Kanal Amudaryodan Pulizindon burnidan boshlanib shim. tomonga Tallimarjon suv omboritacha oqib boradi (bosh mashina qismi 80 km cha), u yerdan kanalning oʻzioqar qismi boshlanadi, Qarshi magistral kanalidan Qarshi choʻlining quyi zonasini sugʻorish uchun Shoʻrsoy tarmogʻi, yuqori zonasini sugʻorish uchun Mirishkor tarmogʻi suv oladi. Kanalning 1navbati qurilishi 1965-yilda boshlanib, 1973-yilda nihoyasiga yetdi. Uz. 290 km (100 km dan koʻproq qismiga beton, betonplyonka qoplama yotqizilgan), bosh qismidagi maksimal suv oʻtkazish imkoniyati 195—220 m3/s ga yaqin, suv kuchli nasoslar bilan 6 bosqichda 132 m balandlikka koʻtarib beriladi. Kanalning asosiy vazifasi Amudaryo suvini Qarshi choʻlidagi qurgʻoqchil, asosan, gʻoʻza ekiladigan maydonlarga yetkazib berish. Qarshi magistral kanalining bosh qismida umumiy quvvati 450 MVt boʻlgan 6 nasos st-yasi (36 nasos agregat) qurilgan. Nishon, Qarshi, Gʻuzor, Koson va boshqalar tumanlarda 200 ming ga dan ziyod yer sugʻoriladi.