Oymomo, yonimga tush…

 Buvijonim

Bagʻri issiq buvim bor,

Mehrlari koʻp bisyor.

Pazandalar juda ham,

Havas qilgudek biram,

Boʻlsa-chi, hayit bayram,

Dasturxonimiz chunon

Ketadi chiroy ochib,

Xushboʻy hidlar taratib.

Boʻgʻirsogʻu qushtili,

Shirin nonlar xilma-xil.

Koʻzimiz quvontirar,

Ishtahamiz uygʻotar.

Shirin holvaytarni-chi,

Pishiradilar tez-tez,

Chunki yaxshi koʻramiz,

Men va ukam – ikkimiz.

Koʻp ajoyib buvim bor,

Xoʻp gʻaroyib buvim bor.

Hammaga ham mehribon,

Soʻzlari asal biram.

Peshonam silaydilar,

Kamolim tilaydilar.

Oymomo

Oymomojon, oymomo,

Yerga tushgin bir zumga,

Yaqindan bir koʻraman,

Sen-la oʻrtoq boʻlaman.

Har oqshom koʻkdan boqib,

Yulduzdan marjon taqib,

Zulmatni yoritasan,

Meni maftun etasan.

Senga oshiq hamma joy,

Daryoyu koʻl, toshqin soy,

Osmonoʻpar togʻlar ham,

Keng dalayu bogʻlar ham,

Anglolmay sinoating,

Bardoshu qanoating,

Hamisha lolman, hayron,

Qalbda nuring charogʻon.

Oymomojon, oymomo,

Yonimga tush bir zumga,

Yaqindan bir koʻroyin,

Chiroyingga toʻyoyin.

Qoʻshni bola

Qoʻshni bola Ibrohim,

Oʻzi shoʻx, soʻzi shirin.

Bir gʻalva boshlar doim,

Sira bilmaydi tinim.

Tunov kuni koʻchada

Bir holda koʻrib qoldim,

Peshonasida gʻurra,

Qiziqib gapga soldim:

– Ha, toychoq, nima boʻldi,

Yo yiqilib tushdingmi?

Qogʻozdan kema yasab,

Yo osmonga uchdingmi?

Ibrohim der: – Akamga

Oʻynaylik, deb turvoldim.

Quvlayotib boshimni

Isitkichga urvoldim.

Oʻgʻlimning savollari

Jajji oʻgʻlim Bunyodning

Savollari juda koʻp.

Qoʻyib bersangiz bir zum

Qator qiladi toʻp-toʻp:

– Oyi, ayting qayda der,

Yulduzlarning otasi?

Qayda ekan ularning

Mehriboni – onasi?

– Qoʻshni bola Botirning

Sochlari nega sariq?

Xol akaning echkisi

Koʻp oʻt yesa ham oriq.

– Nega bogʻcha opamiz

Koʻp uxlatib qoʻyadi?

– Oʻyinchoqlar oʻynatmay,

Tek oʻtqazib qoʻyadi?

Oʻgʻlim boshin silayman,

Uzoq umr tilayman.

Savollarga bir-bir

Javoblarim ulayman.

Zahro HASANOVA

“Sharq yulduzi”, 2011–1