Otauli (1949)

Otauli (Rahimjon Otayev) 1949 yilning 3 aprelida Janubiy Qozogʻistonning Turkiston tumani Chipon qishlogʻida tugʻildi. Mirzo Toshkent Davlat universiteti filologiya fakulteti kechki boʻlimida tahsil oldi (1967–1973). Ayni choqda Alisher Navoiy nomidagi Til va adabiyot institutining xalq ogʻzaki ijodi boʻlimida ishladi. Soʻngra oʻrta maktablarda oʻqituvchi (1973–1976,1979–1981), Oʻzbekiston xalq taʼlimi vazirligida uslubchi (1976–1979), Oʻzbekiston Matbuot va axborot agentligida maslahatchi-muharrir (1981–1983), Oʻzbekiston Yozuvchilar uyushmasida adabiy maslahatchi (1983–2010) va masʼul kotib (1992–2009) vazifalarida xizmat qildi.

Otaulining “Murodxon” dostoni badiiyatiga bagʻishlangan dastlaki ilmiy maqolasi 1973 yilda “Fozil Yoʻldosh oʻgʻli” jamoaviy toʻplamda, “Sirli olam” nomli ilk badiasi 1977 yilda “Guliston” jurnalida bosildi, keyin “Osmon toʻla yulduzlar (Tuygʻular haqida suhbat)” (1983), “Qalb darchasi” (1988), “Surnay navolari” (1991), “Elchi (Afandi oʻlmaydigan boʻldi)” (1999), “Ruhiyat ehromi” (2006), “Zamona zayli” (2006), “Tilsim (Turkiston dostoni)” (2009), “Otning qashqasi” (2010), “Soʻz sanʼatidan saboqlar” (2012), “Koʻzlarga toʻtiyo soʻzlar” (2013), “Bilga xoqon dostoni” kabi qissalar, badialar, hikoyalar, nasriy doston va adabiy-tanqidiy maqolalar kitoblari bosilib chiqdi. Uning “Bilga xoqon” va “Ulus” nasriy dostonlari, “Nuh kemasi”, “Zanjirband sher”, “Yoʻriq”, “Amu nasimi”, “Tavba”, “Poyon”, “Qorasuv”, “Bir qamar siymo”, “Vido” “Dasturxon” kabi tarixiy hikoyalarida Bilga xoqon, Abu Nasr Forobiy, Mahmud Koshgʻariy, Mahmud Zamahshariy, Mahmud Gʻaznaviy, Pahlavon Mahmud, Nosiruddin Burhonuddin Rabgʻuziy, shuningdek, Furqat, Behbudiy, Choʻlpon kabi buyuklar hayotining ibratli jihatlari taʼsirchan qalamga olingan.

Otauli tarjima sohasida ham barakali ijod qilib, eron adibi Muhammad Ali Jamolzodaning “Shoʻrobod” asarini, italyan adibi Dino Butssatining sara hikoyalari, abxaz adibi Fozil Iskandarning “Quyonlar va boʻgʻma ilonlar” falsafiy ertagi va bir qancha sara hikoyalarini, qozoq adibi Muxtor Magʻavinning “Tiriklik qoʻshigʻi”, shuningdek, Oʻzbekiston Qahramoni, atoqli qoraqalpoq adibi Toʻlepbergen Qaipbergenovning “Qoraqalpoqnoma” roman-essesi, “Bobomga xatlar” badiasi, “Sahro bulbuli” va “Oydoʻs bobo” dramalarini, Ollonazar Abdiyevning “Eran saxiy” qissasini, jahon xalqlari afandi latifalari jamlangan “Yigirma toʻrt Nasriddin” toʻplamini ona tilimizga oʻgirdi.

Otauli rus tilida ham ijod qiladi. Uning maqolalari, badia va hikoyalari “Zvezda vostoka”, “Vostok sviʼshe” jurnallarida, “Narodnoye slovo” gazetasi va jamoaviy toʻplamlarda eʼlon qilindi.

Adibning “Tilsim (Turkiston dostoni)” asari Oʻzbekiston Yozuvchilar uyushmasi mukofotiga (1995) sazovor boʻldi.

Yozuvchi “Mehnat veterani” (1989) hamda “Shuhrat” (2000) medallari bilan taqdirlangan.

“Oʻzbek adiblari” (S. Mirvaliyev, R. Shokirova. Toshkent, Gʻafur Gʻulom nomidagi adabiyot va sanʼat nashriyoti, 2016) kitobidan.