JIYDA ShOXIDAGI PARILAR
Qorongʻi kecha edi
Oqshom tevarakni yashirgan edi
Non jiyda yonidan oʻtib borayotgan edim
Yoqimli shivirlarni eshitdim
Qaradim tepaga bir jiyda shoxlarini
Koʻrdim eshitdim koʻrdim eshitdim
Badanimni yuzlab asalarilar talagan kabi boʻldi
Asalarilar bir shirin chaqmoqda edilar
Tubsiz osmonda tomir
Yoydi chaqmoq
Qarasam koʻzlari moviy balki yashil
balki bol ranggida
Parilar oʻtiribdi shoxlarda
sochlari tillo balki zumrad
Tusi ila yonmish tush koʻrdimmi yo debman
Bir gal tosh ichidan oqqan shunday buloqni
Koʻrgan edim shu esimga tushdi
Bir shirin shirin
Esladim
Kuldim
Yigʻladim
Ichimda
Tinch
Oh
Qorongʻi kecha edi
Oqshom tevarakni yashirgan edi
Non jiyda yonidan oʻtib borayotgan edim
Tunni chayqatib bir ohista kulmakda edi jiyda
Parilarning qoʻli qirmizi sochi tillo ovozi kumush
Ranglar boshimni bir aylantirdilar
Ey odam dedi bir pari nechun
Umring yigʻiga chulgʻanmish
Yashash istarsen yashab bilmassen
Kulsang biz kabi bir ozod kul
Boʻsa bilganing zaqqumdan achchiq
Kel beri sen jin kabi kel
Qorongʻi kecha edi
Oqshom tevarakni yashirgan edi
Non jiyda yonidan oʻtib borayotgan edim
Tepaga boqdim dum-dumaloq
yoqutlar raqsini koʻrdim
Tepaga boqdim yoqutlar orasida
shar singari oltinlarni koʻrdim
Togʻlarni koʻrdim soʻqmoqlarni koʻrdim
Yollarini titratib xirqirayotgan
arslonlarni koʻrdim
Qah qahaga toyinib yiqildim men
Turdim soyalarim yana yiqildi
Bir kaft
Ustida
Yurib
Borayotgan
Kabi
Boʻldim
Non jiyda yonidan oʻtib borayotgan edim
Oqshom tevarakni yashirgan edi
Qorongʻi kecha edi
Jiyda kecha oqshom
Oq
Shom
Sham
TUT
Kovagiga chumchuq uya solgan ey
qishlogʻimizdagi tut seni sogʻindim
xon qizi gavhar munchoqdek shippa
yopishgan yantoq koʻrgim keladi seni
men yer hidini sogʻindim loy
oʻyinchoqlarimiz turpoq emish hanuz
boʻjilari ila qoʻrqitgan dala tuzlarimiz qani
uyalibdimi mendan kichraymish kulba
nos ranggidagi qovoqlar tovlanmish
suvlar oqayotganmish
bir yigʻi kabi
semiz oʻt doʻmboq qiz kabi erkalanib yotmish
mol tezagi turtib uygʻotdi allanimalarni
balki ishonmassan ter hidi esimdadir
ishqdan menga saboq bergan qizaloq
unutarmidim men qatiq isini
Odam tilida gapirsang boʻlmaydimi axir
dermish olifta bitiklarini oʻqigan chol
Tut esa tushimda balki oʻngimda
momomning beparvoligi ila
chumchuqlarini chirqiratib men tarafga kelayotganmish
jodugar kovushi yangligʻ tomirlarini
birma-bir bosib
OVOZ Shamol Shamol bolang quduqqa yiqildi
Ketiga tezak tiqildi
Tez kel olib momoqaldirogʻingni
SUV MINORASI
Nurni ushlamoq istarsan tutmoq istarsan
junun vodiysiga xat tashirlar qushlar ham
koʻzingdan sochilgan shuʼla aqlimni barbod qildi
barcha nurlar qochdilar
kamalakka doʻndilar
oʻq yoy boʻlur qoʻlingda
jonim nishon kamonga
tunmi bu boshqa tus yoʻq yo sochmi
chulgʻansin jismim noz bilan ishva bilan
bir koʻtarilar bir tushar bir mavjlanar
yiltiroq ashyolar oʻgʻirlarmi xayolimni
oqqan kabi boʻlaman balki daryodirman
uchgan kabi boʻlaman oydirman balki
eshitmay gapirayotgan sen ekaningni sezdim
olovga nega yongani qoʻymaysan
shamol koʻylaklaring shitiridadir
imlolarni paypaslab oʻqimoqdaman
faraz qilki koʻzing jodusi ila kuygan bagʻrim kabi
barmoqlarim yonmoqda choʻgʻ boʻlmoqda birin ketin
adashdim Suv minorasiga qarab turibman
Kamalak oʻlkasiga kapalak boʻlib uchaymi
tomchi zarbi yangligʻ tovush meni uygʻotgali keldi
uyqu aro uygʻonganimni hech kimsa bilmas
Bahrom ROʻZIMUHAMMAD
“Yoshlik”, 2014 yil 10-son
https://saviya.uz/ijod/nazm/oqshom-tevarakni-yashirgan-edi/