Yoʻlga tushib oʻzi koʻrgani kelgan,
Sezib-sezib holim soʻrgani kelgan.
Qoʻlida tugunin, yelkada yukin
Koʻtarib, borini bergani kelgan.
Ovvora onam-a, sarson-a, onam.
Qalbining beshdan bir parchasi oʻzim,
Xavotir uyining darchasi oʻzim.
Diydorni yetaklab kelgan chogʻida
Taskin yoshlarining barchasi oʻzim.
Sadpora onam-a, tiyron-a onam.
Vaqt yetmaslarga-ku saylandim, ona,
Ming bir bahonaga shaylandim, ona.
Bu yerni qishloqqa oʻxshash deb oʻylab,
Tosh shaharda toshga aylandim, ona.
Dilpora onam-a, hayron-a, onam.
Men nima ham qildim sizga arzirlik,
Bir soʻz topoldimmi tilga olgulik.
Bilmadim, yozganim faqat sheʼr boʻldi,
“Bir qiz” boʻloldimmi sizga orzulik,
Gulyora onam-a, biyron-a, onam.
Nargiza ASAD
https://saviya.uz/ijod/nazm/onam-orzusi/