Post Views:
238
NIYOZBEK QAL’ASI – Chirchiq daryosining o‘ng qirg‘og‘idagi qal’a xarobasi (hozirgi Chirchiq shahri hududida bo‘lgan). Toshkent va uning atrofini suv bilan ta’minlovchi qadimiy irrigatsiya inshooti – Bo‘zsuvni dushmandan himoya qilish maqsadida qurilgan. Qal’a nomi Muhammad Solihxo‘janing yozishicha, To‘labiyning o‘g‘li Niyozbek nomi bilan bog‘liq bo‘lgan. Niyozbek qal’asini 1935 yilda arxeolog V.D.Jukov tadqiq qilgan. Qal’a to‘g‘ri to‘rtburchak shaklida bo‘lib, atrofi tuproq ko‘tarma bilan o‘ralgan. Qal’aning ustki qismidan Qo‘qon xonligi (19-asr) davriga oid materiallar topilgan. General M.G.Chernyayev boshchiligidagi chorizm qo‘shinlari Toshkentni qamal qilgan paytda (1865) xarobaga aylantirilgan. Niyozbek qal’asi egallanishi bilan Toshkent aholisi suvsiz qolgan.
«Toshkent» ensiklopediyasi. 2009 yil
https://shosh.uz/uz/niyozbek-qal-asi/