( Toshkent viloyati Yangiyo’l tumani 57-umumiy o’rta ta’lim maktabi boshlang’ich sinf o’qituvchisi Mirzaxmatova Shaxnoza Shukratovna 2017-2018-o’quv yilida tuzgan va o’tkazgan ssenariy)
Sinf xonasi bayramona bezatilgan. Sinf to’riga bilimlar mamlakati deb yozilgan. Monitoring o’rnatilgan.
O’qituvchi:
Assalomu alaykum aziz ustozlar, mehribon ota-onalar, qadrli mehmonlar. Yaqindagina farzandlaringiz maktabga ilk qadam qo’ygan edilar. Bilim dargohiga yaqindagina kelgan bo’lsalar ham, tirishqoqlik bilan astoydil mehnat qilib o’qishni, yozishni, qo’shish va ayirishni puxta o’rgandilar. Bugun esa o’z bilimlarini, o’rganganlarini sizlarga namoyish etish uchun “Bilimlar mamlakatida” deb nomlangan bayram tadbirini tayyorlaganlar. Marhamat davraga 1-“B” sinf o’quvchilarini taklif etamiz.
Musiqa sadolari ostida sinfga o’quvchilar kirib keladilar(Sharq taronalari S.Rahmatov)
Durdona: Biz to’rt oy avval maktabga ilk qadam qo’ygan edik. Bugun “Bilimlar mamlakatida” sayr qilib yuribmiz.
Isomiddin: “Bilimlar mamlakatida” bemalol yurish uchun harf tanimoq, o’qish – yozishni bilish zarur. Qani, ko’raylikchi bolalar harflarni tanisharmikan?
Umid:
Alifbe bo‘ldi sirdosh
Ilm yo‘lida yo‘ldosh
Sochdi ziyo nurini
Bo‘lib misoli quyosh
Gulnoza:
Alifbeni tugatdim Endi o’qiy olaman So’zlarni qo’shib birga Jumla to’qiy olaman.
Behruz:
Harflarni tanidim, Yetib oldim siriga So’zlar tuzsa bo’larkan Birin qo’shib-biriga.
Odina:
— Qancha unli, undosh bor, Hammasini bilaman, To’plab bilim, zehnimni, Sizni xursand qilaman
Javohir:
— A’lo o’qish vazifam Tolmayman o’rganishdan. Olimlar ham ilmni Boshlagan “Alifbe”dan.
Nazifa:
— Ichga sig’mas quvonchim Maktabim bag’rin ochdi Alifbejon kitobim, Oftob kabi nur sochdi.
Ilhom:
— Alifboni yod oldim, Harflar tilsim go’yo. Ona, bola, Vatan, non, Mazmuni cheksiz dunyo.
Mubina:
— “Bilimlar mamlakati”
Boshlanar alifbodan
O’ttizta do’stimiz bor
Harfdan va yozuvdan.
Nursultonbek:
— Rahmat aziz ustozlar, Mehringiz dilimizda Yoshlikda olgan bilim
Xayrulla: — Ma’noli shirin so’zi Oftobday nurli yuzi Bilmaysizmi bolalar Qani “Alifbe” o’zi?
— Do’stlar! Qani endi davramizga Alifbeni chorlaymiz?
Xojiakbar: — Kitoblarning bobosi, Yo’l boshlovchi donosi. Har yurakka nur ziyo Taratish muddaosi “Ilm ista” – xitobi Bu – “Alifbe” kitobi.
Bahodir: — U borki, yo’llar ravon, Oshamiz bir-bir davon. Borayapmiz mardona Bilimlar yurti tomon “Ilm ista” xitobi. Bu – “Alifbe” kitobi!
— Alifbejon, kel tezroq,
Do’stlaring senga mushtoq
1-Alifbe kitobi: Salom aziz mehmonlar, Shirin-shakar bolalar. Bugun bayram tantana, “Alifbe” to’yi bilan sizlarni tabriklayman.
Boxirova Aziza: — Bugun sizga ko’rsataylik, Maktabning bor ma’nosini. Harflarni jamlovchi, Alifbe muddaosini.
2- Alifbe kitobi: — Aziz bolajonlar! Siz mendan nimalarni o’rgandingiz?
Aziza Jabboraliyeva: — Eng avvalo assalomni, Tildan chiqqan kalomni Joyni bilib so’zlashni Yaxshilikni ko’zlashni.
O’tkirbek: — Dunyo yorug’ligini Ulug’ ekan oftobni Vatanning qutlug’ligin Aziz ekan kitobni.
3- Alifbe kitobi — Balli ey dili oqlar, Fan bilimga chanqoqlar Minnatdorman sizlardan Baxtli o’g’il-qizlardan.
Odil:
Alifboni o’rgangan
Bolalar jim turmaydi
Harflar tilga kirib
Odamlarday so’zlaydi
Slaydlar namoyishi beriladi va o’quvchilar harflarga mos she’rlar aytadilar.
A –
Ahil asalarilar
Azonlab tushar ishga.
Atrof,dala-bog’lardan
Asal yig’ishar qishga
B —
Baliq boyvuchcha, desam,
Bekor gap, dema hecham.
Boq , o’zing ana Xayri,
Badanni yaltiraydi.
D –
Delfin mohir dengizchi,
Dono, aqlli biram.
Dengizda cho’ksa birov,
Darrov beradi yordam.
E –
Edikdo’z Echki eski
Etiklarni rostladi.
Eplab qolipga tortib,
Eshakvoyga mosladi.
F –
Farrosh fil xola faqat
Ko’chamizni supurar.
Fayzli bu ko’chamizdan
Xushbo’y hidlar ufurar.
G-
Gimnastikachi
Gavdali, durkun.
Gavdasi uzun,
Gorilla maymun.
H –
Hakka harbiy xizmatda
Himoyachi zo’r posbon.
Havodan o’tmas pashsha
Hattoki yerdan sichqon.
I –
It ishonchli izquvar,
Ishini yaxshi bilar.
O’g’rilik qilsa birov,
Isini olib darrov
Izlab,izlab topadi
Irillaydi qopadi
J –
Zarroh jayra xo’p zo’rda
Bemorlarga g’amho’rda.
Jon og’ritmas ninasi,
Ishonmagan sinasin.
K-
Kalamushvoy kemirar,
Kundan kunga semirar.
Boshqa kasi-kori yo’q
Andishasi , ori yo’q.
L-
Lofchi laylak lof urar,
Laqma , laqqa baqaga.
So’ng cho’qib shartta yutar,
Saboqdir bu barchaga.
M-
Maymun bilan mosh mitti,
Masharaboz o’yinchi.
Maydonda mashq qilmoqda,
Siz ham bitta ko’ringchi.
N-
Ninachixon raqqosa,
Nozik, navnihol rosa.
Nazar soling naqadar
Nafis raqsga tushar.
O –
Ot oddiy ishchi
Omborda yukchi.
Ortib don-dunni,
Oppoq tuz unni,
Ortib yeladi.
P –
Pingvin xola pazanda,
Piyoz, sabzi qozonda.
Peshin palov pishsin deb,
Ish boshlagan azonda.
Q –
Qaldirg’ochga qoyil-a,
Qarang qanday quruvchi.
Quribdi loydan uya,
Qotiribdi ko’ringchi.
R –
Rassom buzoq rasm solar,
Quyon qo’rqib razm solar.
Rasmlarning zo’rida u,
Rosa kata bo’rida u.
S –
Sa’vaxonim suxandon,
So’zlari biyron-biyron.
Soling quloq, qanday soz,
Sehrli, sohir ovoz.
T –
Tipratikan tikuvchi
Tinmay tikar tun-u kun.
Turli-tuman buyurtma,
Taxlangan tugun-tugun.
U –
Uchqur uchuvchi ukki,
Uzoq-uzoqqa uchdi.
Uloqcha uchaman deb,
Uzala yerga tushdi.
V –
Va’zxonlik qilar to’ti:
“Vijdonli bo’lish kerak.
Va’da berdingmi, bo’ldi
Vaqtida qilish kerak”
X –
Xabarchi xo’roz saxar
“Xushxabar” deb qichqirar.
-Xalos bo’ldik zulmatdan,
Xatarli tun-kulfatdan
Y-
Yo’l-yo’l kiyimli yo’lbars,
Yo’l nazorat xodimi.
Yurgan yo’lovchilarning
Kuzatar har odimin.
Yo’l chiroqqa qaramay,
Tartib buzsa qay biri.
Yo’lga solib, ayamay,
Berib qo’yar ta’zirin.
Z –
Zarg’aldoq zargar ekan,
Ziragi gavhar ekan.
Ziyrak turib doimo,
Zarlarin asrar ekan.
O’ –
O’qituvchi o’rdakning
O’tgan darsini har kun,
O’zlashtirib o’rganar
Navqiron o’rdakchalar.
G’ –
G’azalxon g’oz sahnada,
Qo’shiq aytar “g’oq-g’oq” deb,
Kekkaymang davralarda
Kamtar bo’ling o’rtoq deb.
Sh –
Shifokor sher oldiga
Shum tulki shoshib keldi.
“Voy boshim” deb yolg’ondan,
Maktabdan qochib keldi.
Ch –
Chigirtka zo’r cholg’uchi,
Chalar kuy charchamasdan.
Chirildoqlar jo’r bo’lib,
Chirillar har tarafdan.
Ng –
Tayyorga ayyor nahang,
Tekinxo’r takasaltang.
Qarmoqdagi o’ljaga
Og’iz solgandi qarang.
“ ’ “ tutuq belgisi –
— Kimning kelsa bilgisi, Menman tutuq belgisi.
Unlidan keyin kelsam
Cho’zibroq talaffuz et.
Tursam undoshdan keyin
Birozgina to’xtab o’t.
Qo’shiq “Alifbe”
Alifbodan harflarni Oldimizda saf tortishdi
Biz or’gandik oz – ozdan, Askarlarday harflar
Minnatdormiz o’rgatuvchi Barchasiga qo’shiqlarda
Muallimdan – ustozdan Berib o’tdik ta’riflar
Har bir harf daftarlarda Tilimizni sayratadi
Gijinglaydi toy bo’lib Alifbomiz bayrami
Yozganimiz ko’rinadi Dilimizni yayratadi
Yulduz bo’lib, oy bo’lib Bayramlarning hurami
Alifbe: Barakalla, bolalar ko’rdimki, alifbodagi hamma harflarni tanib olibsiz.
— Lekin shu harflarni qo’shib so’zlar ham yoza olasizmi?
Bahodir: — Albatta, biz harflarni qo’shib o’zimiz uchun sevimli bo’lgan. Vatan, ota, ona, uztoz kabi so’zlarni hech qiynalmay yoza olamiz. Marhamat, hozir sizlar buning guvohi bo’lasiz.
Vazira: Bizni bag’riga bosgan
Bolalar yayrab o’sgan
Yuksalaver yildan – yil
O’ZBEKISTON – JON VATAN
Nursultonbek: Farzandiga jon fido
Tinib – tinchimas aslo
Bardam salomat bo’ling
OTA – ONAM doimo.
J.Aziza: Bilimlar mamlakatin
Makon aylagan bizga
Ta’zimu rahmat deymiz
Sizday aziz USTOZga.
Ozodbek: Qo’limizda bor kitob
Yuzumiz qo’yo oftob
Bizni doim bezaydi
Go’zal xulq, yaxshi ODOB.
Abdurazzoq: Bo’lsin doim osuda
Ona – zamin albatta
Osmon bo’lsin MUSAFFO
Biz sevgan ona yurtda.
Baxtiyor: Bizlar maktab qo’ynida
O’qib, olamiz bilim
Kelajakda bo’laylik
Yurtga kerakli OLIM.
Alifbe kitobi:
Barakalla, do’stlarim
Xursandman sizdan juda.
To’rt oy umr, vaqtingiz,
Hech o’tmabdi behuda.
Bolajonlar, men sizga
Birinchi kitobdurman
Dilingizni yoritgan
Go’yoki oftobdurman.
Ko’rdim, bugun donosiz
Hammadan ham a’losiz
O’qish , hisobni bilgan
Aqlingiz ham rasosiz.
Endi boray dam olay
Sizga baxt – omad tilay
Ongingiz charxlash uchun
Bir sovg’a tashlab ketay.
Bu sovg’amni avaylab
Mendek aziz bilinglar.
Yozganlarin o’rganib,
Hurmatini qilinglar.
Xayr, xayr bolalar
Meni sira unutmang
G’ayrat bilan o’qingiz
Nasihatim unutmang.
O’g’il bolalar ijrosida raqs. “Andijon polka”
Mubina:
O’qi,o’qi.. Sovg’a tashlab ketganmish. Yana kitobdirda. Bayramning menga qizig’i yo’q. Uyga ketdim. (uyga qarab yuradi)
Mubina:
Ey, hammasi jonga tegdi. Alifbeni o’qi, chiroyli yoz. Charchab ketdim. Qayerdanam maktabga bordima, maza qilib o’ynab yursam bo’larkan. Kim o’ylab topgan ekan shu harflarni. Yana bolalarning unga atab bayram qilayotganlarichi? Yaxshi ham bayramdan chiqib ketdim. So’zlarni qo’shib o’qiy olmasam, bayramning menga qizig’i yo’q. Iye, qalamku. Juda antiqa ekan. Kim tushirib qo’ydi ekan? Havorang ekanmi, ochib ko’raychi. (qalamni ochqichda ochadi. Qalam qimirlab qo’lidan tushib ketadi)
Qalam: Baxtiyor
Hoy qizcha, men sehrli qalamman. Meni ochib yaxshi qilding. Xizmatingga muntazirman. Sening uchta tilagingni bajo keltiraman.
Mubina:
Rostdan ham sehrlimisan. Nima tilak aytsam ekan? Ha, topdim, birinchisi alifbedagi hamma harflar yoqolib qolsin, ikkinchisi chiroyli qo’g’irchog’im bo’lsin.
Qizchaning ko’ngli bo’lsin chog’, paydo bo’lsin qo’g’irchoq.
Mubina:
Yashavor, rahmat! Juda yaxshi bo’ldi. Endi menga hech kim o’qi, yoz demaydi. Qo’g’irchog’im bilan o’ynayman. Hozir qornimni to’yg’azamanda, ko’chaga chiqaman. Hoy ruchka, men kabob va issiq non paydo bo’lishini hohlayman.
Qalam:
Marhamat, yeyishni xohlagan narasang nomini yoz. Shu zahoti paydo bo’ladi. Qalamim sehringni ko’rsat!
Mubina:
Ka-bob , non . Iye, qalam yozmayaptiku!
Qalam:
Eh, attang! Axir hozirgina barcha harflarni yoqotib yubordimku. Endi nima qilamiz.
Mubina:
Axir sen sehrlisan-ku!
Qalam:
Mening sehrim faqat uchta tilakka yetadi. Sen ularni aytib bo’lding. Oxirini o’ylamay ish qilding. Harflarsiz hayotni tasavvur qilib bo’lmaydi. Bir yo’li bor. Sen ertaklar mamlakatiga borib harflarni yig’ib kelasan.
Mubina:
Qanday qilib, men bir o’zim qo’rqaman.
Qalam:
Do’stlaringdan yordam so’ra
Mubina:
Yordam berisharmikan?( do’stlari yoniga boradi) do’stlarim men xato ish qilib qo’ydim. Sehrli qalam yordamida barcha harflarni ertaklar mamlakatiga sochtirib yubordim
Bolalar:
Bu nima qilganing. Axir bugun katta bayram qilayotgan edik-ku!
O’tkirbek:
O’ylamay ish qilibsanda. Bizku harflarni tanib olgan edik. Kelgusi yil ukalarimiz qanday qilib o’qish, yozishni o’rganishadi.
Vazira:
Bolalar tortishmanglar. Shundoq ham Mubina qilgan ishiga pushaymon bo’lyapti. Bir yo’lini topib harflarni joyiga qaytaraylik.
Isomiddin:
Ertak boboni chaqirib yordam so’rasak-chi? Hammamiz baravar ertak boboni chaqiramiz.
Bolalar:
Ertakbobo, ertakbobo!
Qo’shiq:
Assalomu alaykum bobojon
Vaalykum assalom, nabiralarim
Bizga ertaklar olib keldingizmi?
Albatta olib keldim shirintoylarim
Ertaklarda bor hikmat,
Ulardan oling ibrat
Ezgulikka yetaklar
Zo’r mo’jiza ertaklar
Kitoblarim ochiling, jajjilarga ko’rining!
Voy qanday go’zal bu olam!
Orzular bilan birga,
Yur ertak olamiga
U yerda sehr bobo,
Bizlarni qilar duo.
Ajoyib bu ertaklar
Yaxshilik sari chorlar
Naqadar go’zal olam
Mehr nurin taratar
Hayotimiz yashnatar
Naqadar go’zal olam
Ilhom:
Bobojon bugun olib kelgan ertaklaringizni o’qiy olmaymiz. O’rgangan harflarimiz ertaklar mamlakatiga sochilib ketibdi. Sizdan yordam so’rab chaqirdik
Ertak bobo:
Chakki ish bo’libdiku, nabiralarim. Sen nega yig’layapsan, qizalog’im?
Mubina:
Men barcha harflar yoqolib qolsin deb tilak bildirgan edim. Xato ish qilib qo’yibman.
Ertakbobo:
Xatoyingni tushungan bo’lsang yaxshi. Men senga xarita beraman. Xarita bo’ylab yo’qotgan harflaringni topib kelasan.
Mubina:
Bobojon , axir men harflarni qo’shib o’qiy olmayman. Xaritadagilarni ham tushunmayman.
Ertakbobo:
Harflar topilgach ularni o’qib, o’rganishga so’z bersang senga yordam beraman.
Mubina:
Albatta , so’z beraman.
Ertakbobo:
Orangizda yaxshi o’qiydigan bolalar bormi?
Xojiakbar:
Albatta, Nursultonbek yaqinada bo’lgan bilimlar sinovida o’qish fanidan, Aziza ona tili fanidan yuqori o’rinlarni egallashdi.
Ertakbobo:
Yaxshi, bo’lmasa sen bilan Nursultonbek, Aziza ham boradi. Sizlarga osonroq bo’lishi uchun sehrli tayoqchamni berib yuboraman. Javoblarni to’g’ri aytsangiz tayoqchamning chiroqlari yonadi. Zarur bo’lganda u orqali do’stlaringizni yordamga chaqirasiz. Esingizda bo’lsin, xaritadagi hayvonlar nomini ertaklardan qidirasiz. Xarita o’rmondagi eng katta daraxt tagida. Oq yo’l bolajonlarim!
Nursultonbek:
Qani, ketdik bo’lmasa. O’rmondagi eng katta archa daraxtini qidiramiz.
Aziza:
Qaranglar eng katta daraxt ko’rindi.
Nursultonbek:
Tagini ko’raylikchi! Ha, mana xaritani topdim. Xaritadagi birinchi rasm ayiqniki ekan. Qaysi ertakdan ekan-a?
Mubina:
Tanidim, u “Qizaloq va Maymoq” ertagidan
Nursultonbek:
To’g’ri topmading, tayoqcha yonmadi.
Aziza:
Balki “Bo’g’irsoq” ertagidandir.
Nursultonbek:
Juda to’g’ri. Tayoqchamiz yondi.
Ayiqpolvon: Ramazon
G’o’-go’-go’. Qishda uyqumni buzib bezovta qilgan kim? Nega meni uyg’otdinglar. Hozir ta’ziringizni berib qo’yaman.
Aziza:
Bizni kechiring. Biz yoqolib qolgan harflarni qidirib yuribmiz. Bizni ertakbobo yubordilar.
Ayiq:
Ertakbobo yubormaganlarida hammangizni jazolar edim. Harflarni shunchaki berib yubora olmayman. Savolimga to’g’ri javob bersangiz, ularni olasiz. Alifbeyingizda nechta harf bor?
Aziza:
Biz o’rgangan alifbeda 29 harf, bitta belgi bor. Harflarning 6 tasi unli, 23 tasi undosh.Ular ham jarangli, jarangsizlarga bo’linadi.
Ayiq:
Barakalla qizaloq. To’g’ri javob berding. Hozir inimdan harflarni olib chiqaman. Inimda uxlab qolib ketmasligim uchun biror nima o’ylanglar.
Nursultonbek:
O’g’il bolalar bayramga atab grekcha raqs tayyorlagan edilar. Ulardan yordam so’raymiz. Sehrli tayoqcha do’stlarimiz yordamga kelsinlar!
O’gil bolalar ijrosida sho’x raqs
Ayiq:
Man oltita harf. Zo’rg’a topib chiqdim. Bo’shagan asal idishlarim ichiga tushib qolibdi.
Bolalar: Rahmat polvonjon!
Aziza:
Endigi manzilga Malvina deb yozib, qo’g’irchoq rasmini qo’yishibdi.
Mubina:
Kim ekan u Malvina
Nursultonbek:
Malina dedingmi?
Aziza:
Yo’q, Malvina. Axir u Buratino ertagidagi bilimdon qo’g’irchoq-ku. Buvim menga bu etakni aytib berganlar.
Nursultonbek:
Esladim, kino va multfilmi ham bor
Malvina:
Salom, bolalar. Bu yerda nima qilyapsizlar?
Mubina:
Yoqolgan harflarni qidirib yuribmiz.
Malvina:
Eh, harflarni ertaklar mamlakatiga sochib yuborgan sizlarmi? Mayli sizga yordam beraman. Faqat savolimga javob berasiz.
Mubina:
Buratinoga ham savol beraverib joniga tekkan edi.
Aziza:
Biz barcha savollaringga javob bera olamiz.
Malvina:
Matematikaga qalaysiz? Undan nimalarni o’rgandingiz?
Mirkamol:
Birdan o’ngacha bo’lgan
Raqamlarni o’rgandik.
O’n ichida sonlarni
Hisoblab, taqqosladik.
“1” Nurillo
Eng oldinda turaman,
Bo’yimga bir qarab qo’y.
Tartib sonlar ichida
Birinchiman bilib qo’y.
“2”
Qomatimni ko’rganlar
Qiyos etar oqqushga.
Mendan dir-dir titraydi,
Ixlosi yo’q o’qishga.
“3” Ziyoda
Bilimingni baholab
Noiloj qoniqaman.
Qachon mendan o’tar deb,
Ko’z tikib toliqaman.
“4” Rustam
To’ntarilgan stolga
O’xshab ketar bo’y-bastim.
Ismim”yaxshi” to’rtta harf,
Uchdan keyinman do’stim.
“5” Zilola
Meni derlar besh soni,
A’lochilarning joni.
Olti sonidir akam,
Uch-to’rt sonlar mendan kam.
“6”
Qorni semiz dumaloq
Beshdan keyin turaman.
Juft sonlar qatorida
Uchinchisi bo’laman.
“7”
Boshga tutib soyabon,
Belbog’cha boylaganman.
Hisob-kitobga do’stlar,
O’zimni shaylaganman.
“8” Ziyoda
Ipak qurti pillasidek,
Qo’sh halqaga o’xshayman.
O’zgarmas qiymatim shakli,
Oyoq osmon tursam ham.
“9”
Shaklim o’xshar vergulga
Oltiga qarindoshman.
Bir xonali sonlarga,
Shu yoshdan karvonboshman.
“0”
Shaklim mening dumaloq,
Bir o’zim yo’q narsaman.
Oldimda turgan sonni,
O’n marta oshiraman.
Malvina:
Harflarni bersam hozir ketib qolasiz. Juda zerikdim, men bilan bir oz o’ynanglar.
Mubina:
Bayramga “Qo’g’irchoq” raqsini tayyorlagan edik. Kel, birga o’ynaymiz. (Qo’g’irchoq raqsi)
Malvina:
Rahmat, maza qildim. Mana harflaringiz, oltita ekan. Kitoblarim orasidan topdim. Hayr, bolalar.
Aziza:
Keyingi rasmda tulkining rasmi joylashtirilibdi.
Nursultonbek:
Ertak nomini qanday topamiz? Ayyor tulki juda ko’p ertaklarda uchraydiku!
Mubina:
“Bo’g’irsoq” ertagi
Aziza:
“Ochko’z bo’ri va tulki ertagi”
Nursultonbek:
Yo’q, bunaqada kech qolamiz. Qaranglar tulkining qo’lida nimadir bor. Ko’zacha ekan. Axir bu “Tulki va ko’zacha” ertagidagi tulkiku. Bu ertakni akam o’qib berganlar.
Tulki:
Salom, ishyoqmas, dangasa bolalar
Aziza:
Nega unday deysan?
Tulki:
Harflarni yoqotib yuborgan bolalarni shunday atashadida!
Aziza:
Sen bizlarni qayerdan taniysan?
Tulki:
Ertakbobo aytgan edilar. Lekin harflarni sizlarga osonlikcha bermayman.
Savollar bilan sinayman. Aytinglarchi o’simliklar qanday turlarga bo’linadi?
Nursultonbek:
Bolalar yordamga keling
Behruz:
Savolingga javob tayyor. Buni atrofimizdagi olam darsida o’rganganmiz. O’simliklar uch turga bo’linadi: o’t-o’simliklar, daraxtlar va butalar. Yana biz ularni yovvoyi va madaniy turlarga ham ajratamiz.
Tulki:
Yaxshi, yaxshi. Biz hayvonlar haqida nimalarni bilasiz?
Abdurazzoq:
Hayvonot dunyosi juda xilma-xil: uy hayvonlari , yovvoyi hayvonlar, parrandalar, qushlar, hasharotlar, suvda yashovchi jonzotlar.
Durdona:
Yovvoyi hayvonlarning o’zi ikki turga bo’linadi: o’txo’r va go’shtxo’r. Sen go’shtxo’r hayvonsan.
Tulki:
Juda yaxshi. Sizlarni aldab ketolmayman shekilli. Mayli oxirgi shartim biror chet el musiqasiga ham raqsga tusha olasizmi?
(hidcha raqs)
Tulki:
Mana harflaringiz. Ko’zacha ichidan topdim. Sanab oling, oltita.
Bolalar: rahmat, tulkivoy.
Nursultonbek:
Endigi manzil quyonvoyniki. Uni qaysi ertakdan topsak ekan?
Aziza:
Rasmga diqqat bilan qarasang qish tasvirlangan.
Nursultonbek:
Tanidim, u “Senimi, shoshmay tur!” ertagidagi quyon-ku.
Quyon:
Bolalar , bu nima qilganingiz? Men yangi yil bayramiga ketayotgan edim. Yo’ldan qaytardingiz. Harflaringizni qidirib topib qo’ydim, sabzili savatim ichida ekan. Harflarni berishdan oldin savolimga javob berasizlar. Maktabda tez aytish, topishmoqlar ham o’rganganmisiz? Hozir menga mashhur tez aytishni musobaqa qilib aytib bering.
Topishmoqni toping-chi. Elakda un elandi, supra unga belandi.
Bolalar: javobi qor.
Quyon:
Mana harflaringiz.
Aziza:
Rahmat ,Quyonvoy. Seni , bizni ko’rib turganlarning barchasini yaqinlashib kelayotgan yangi yil bayrami bilan tabriklayman. Mana bu bizdan yangi yil sovg’asi.
( noviy god raqsi)
Aziza:
Iye, piyozning rasmi nima qilyapti. Axir ertakbobo rasmlarni ertaklardan qidirasizlar degandilar-ku.
Nursultonbek:
Bu “Chippolino” ertagidan. Eshitmaganmisan. Ertakning bosh qahramoni Chippolino nomli piyoz.
Chippolino:
Gud moning children
Nursultonbek:
Inglizcha gapiryptimi? Bahodir, Aziza paydo bo’ling
Bolalar:
Gud moning
Chippolino:
Vot iz yo neym?
Bahodir: may neym iz Bahodir, may neym iz Aziza
Chipolino:
Hov old a yu?
Ay em siks, ay em sevn
Chipolinno:
Vat is it (o’yinchoqlarni ko’rsatadi)
It iz dol, it is bol, it is dog, it is pen, it is buk
Chipolino:
Ol rayd. Vat zis kolor (ranglarni ko’rsatadi)
Bahodir:
It iz blu…
Chipolino:
Barakalla bolalar. Ingliz tilini ham juda yaxshi o’rganibsiz. Ingliz tilida qo’shiq ham ayta olasizmi?
Bolalar qo’shiq aytadilar. ( Good morning) raqs Chivava
Chipolino:
Mana harflaringiz. Beshtasi harf, bittasi belgi ekan.
Mubina:
Kelayotgan kim ekan? Axir hamma harflarni topib bo’ldikku.
No’xatpolvon:
Meni tanimadinglarmi? Axir men mashhur no’xatpolvonmanku. Ertakbobo meni chaqirib: Polvonim, bolalar qilgan xatolarini tuzatishdi, ulardan juda xursandman. Mana shu sovg’alarni ularga eltib ber dedilar. Mana sovg’alarni olib keldim. Sovg’ani bolalar yoniga borganingizda oching.
Rahmat, no’xat polvon. Xayr!
Mubina:
Bolalar meni kechiringlar. Qishki ta’til davomida yaxshi o’qib, o’rganib kelishga va’da beraman. Eng yaxshi do’st kitob ekanligini endi tushundim.
Vazira:
Bolalar, qanday sovg’a olib keldingiz. Ochinglar, ko’raylik.
Bolalar: voy, kitoblar ekan.
Gulnoza:
Qanday yaxshi! Endi ta’tilda zerikmay, maza qilib ertaklar o’qir ekanmizda.
Umid:
Bolalar Alifbe kitobi ham sovg’a tashlab ketgan edi. Ko’raylik qanday sovg’a ekan?
Ilhom:
O’qish, ona tili kitoblari ekan. Ustozim aytgan edilarku, yangi yildan biz bu kitoblarni ham o’qib o’rganamiz.
Isomiddin:
Albatta, axir aytadilarku, kitob bilm bulog’i, o’quvchining o’rtog’i.
Kitob kerakdir
Mahmud Toir
Aziza J:
Surat asli nurni siyratdan olur,
Siyrat esa ilmu-hikmatdan olur
Odamdan ezgulik muhabbat qolur,
Saodat sayliga savob kerakdir
Ko’ngilning mayliga kitob kerakdir.
O’tkirbek:
Kitob dil bog’ida gulning rangidir
Kitob otash ichra dilning rangidir
U qalbning kamoli, aql jangidir,
Ko’pni ko’zlaganga kitob kerakdir,
O’zni izlaganga kitob kerakdir.
Vazira:
O’qigan, uqqanga eli ergashgay,
Oqil yo’lga chiqsa yo’li ergashgay,
Jannatday jilmayib cho’li ergashgay,
Savol yuz ochganda javob kerakdir
Javob jarangiga kitob kerakdir.
Xojiakbar:
Kitob bu osmonning o’ziga narvon,
Kitob bu jahonning ko’ziga narvon
Tirik tarixlarning so’ziga narvon,
Tunga talpinganga mohtob kerakdir,
Kunday kulay desang kitob kerakdir.
Mubina:
Olam olamligin bilmoq uchun ham,
Odam odamligin bilmoq uchun ham,
Qilni qirq tilimga tilmoq uchun ham,
Tilni tutguvchiga shitob kerakdir
Nurni tutguvchiga kitob kerakdir.
O’qituvchi: — Barakalla, aziz o’quvchilar. Mana siz qisqa muddat ichida o’qish – yozishni bilib oldingiz. Kitobning naqadar ulug’ligini bugungi tadbirimizda anglab yetdingiz. Shu munosabat bilan sizga “Savodxonlik muborak” degim keladi.
Shirin — shakar bolajonlar,
Bog’imdagi gul rayxonlar,
Doim bo’ling siz shodonlar,
Savodxonlik muborak.
Ko’zingizda nur o’ynasin,
Sizni ko’rib dil yayrasin,
Tilar bulbuldek sayrasin,
Savodxonlik muborak!
Qo’lingizda bo’lsin kitob,
Chehrangiz go’yo oftob,
Qiling doim ezgu, savob
Savodxonlik muborak!
Bo’ling doim sog’ – salomat,
Dangasalik qilmang faqat,
Mashaqqatga qiling toqat,
Savodxonlik muborak!
O’quvchilar:
Ezgu maqsadimiz — maktabimizning
Faxri, a’lochisi, erkasi bo’lmoq!
Shu qutlug’, tarixiy, tabarruk yurtning
Munosib va mag’rur egasi bo’lmoq!
Raqs: O.Nazarbekov “Qaldirg’och”
O’qituvchi: — Hurmatli uztozlar, aziz ota – onalar, shirin bolajonlar! Shu bilan bugungi tadbirimiz o’z nihoyasiga yetdi. Sog’ – salomat bo’ling. Mehribon ota – onangizga, ona yurtimizga, jonajon xalqimizga xizmat qiladigan bilimdon, serqirra, fidoiy farzandlar bo’lib yetishing. Bilimlarni chuqur egallang. O’z Vatanini chin dildan sevgan vatanparvarlar bo’lib yetishing.
