Izn

Maktabimga hech shoshilmasdim,

Hamma bilar edi feʼlimni.

Kechikardim, parvo qilmasdim:

“Uzr, ustoz, kirsam maylimi?”

Xayolparast, oʻychan shoirga

Tergab-tergab dars berdi hayot.

Goho koʻmib ming bitta sirga,

Goh sevgidan qarz berdi hayot.

Tuygʻularga oʻyin boʻldim xoʻp,

Dil yaramga sepildi tuzlar.

Shoshmagandim, hali erta deb,

Erga tegdi shoshqaloq qizlar.

Tanaffusni kutgan boladay

Bu darslardan zerikdim, rosti.

Jalalarda qolgan loladay

Koʻnglim mudom azobda oʻsdi.

Keyin sizni uchratdim birdan,

Yashillikka burkandi dunyo.

Nazarimda, milyon yil oʻtgan,

Milyon yilga kechikdim goʻyo.

Mana, keldim. Kutaman izn,

Yorugʻ xayol sursam maylimi?

Osmondagi oyim, yulduzim,

Koʻnglingizga kirsam maylimi?

Orif Tolib

2009