Ikki koʻzim ikki ulugʻ daryodir

Pahlavon Mahmud ruboiylaridan

Umrimiz daraxtin past qilma, Rabbiy,

Borliq sharobidan mast qilma, Rabbiy.

Oʻzing karam birla mard yigitlarni

Nokaslarga zeri dast qilma, Rabbiy.

* * *

Koʻngil oppoq, na kek va ginam bor,

Dushmanim koʻp va lekin men hammaga yor.

Mevali daraxtman, har bir oʻtkinchi

Tosh otib oʻtsa ham menga boʻlmas or.

* * *

Jahon, chehra – rangu roʻyi oʻzingsan,

Aql daryo – uning suyi oʻzingsan.

Gul bargida shabnamdayin oʻtirma,

Bu bogʻchaning rangu boʻyi oʻzingsan.

Toʻxtasin JALOLOV tarjimalari

* * *

Ey doʻst, qani ayt, jonmi kerak, jon berayin men.

Har ne eng aziz, sen soʻra, shul on berayin men.

Ey kofiri shaddod, manim qoshima bir kel,

Zunnoring olib, oʻrniga iymon berayin men.

* * *

Qalbingdagi shak-shubha, gumon ketmishdir,

Ruh quvvati ham bir kun, inon, ketmishdir.

Topdim deb aniq nishonni magʻrurlanma,

Topgan u nishoning benishon ketmishdir.

* * *

Gar haq deya jim tortsa figʻon doʻst – chin doʻst,

Qilguvchi ibodatki nihon – chin doʻst.

Koʻz-koʻzlama hech berganu olgan noning,

Non doʻsti emas, aslida jon doʻst – chin doʻst.

* * *

Bogʻmanu bagʻrimda chaman – nolalarim,

Dardimni bilib bosh egdi lol lolalarim.

Ikki koʻzim ikki ulugʻ daryodir,

Qolgan bari daryolar esa bolalarim.

Matnazar ABDULHAKIM tarjimalari