Oqsil zarur
Birinchidan: homiladorga oqsil moddasi zarur. Organizm uchun u o‘ziga xos “qurilish materiali” vazifasini o‘taydi, binobarin ayol organizmida katta miqyosdagi “qurilish” ketayotgan bo‘ladi. Qatiq – tarkibida oqsil moddasi juda yuqori bo‘lgan sut mahsulotlaridan biri hisoblanadi. Agar sut bilan solishtiriladigan bo‘lsa, oqsil qatiq tarkibida yigirma foizga ko‘pdir. Bir piyola qatiqda (240–250 millilitr) oqsil moddasi bir kunlik me’yorining (kattalar uchun) beshdan bir qismi mavjud.
Qatiq – kalsiy manbai
Ikkinchidan, qatiq – kalsiy manbai. Agar ona organizmiga yetarlicha miqdorda kalsiy kelib tushmasa, bu suyaklarning, dastavval tishlarning yemirilishiga olib kelishi mumkin. Buvijonlarimizning bir gapi bor: “qancha bola tuqqan bo‘lsam – shuncha tish yo‘qotganman” deyishadi. Mana shu narsa bo‘lmasligi uchun qatiq ichish kerak vassalom! Qolaversa, organizm boshqa mahsulotlardagi kalsiydan ko‘ra qatiqdagi kalsiyni tezroq o‘zlashtiradi.
Qatiq kandidozga qarshi
Uchinchidan, qatiq til oqarishi ya’ni kandidozga qarshi kurashishga yordam beradi. Kandidozni qo‘zg‘atuvchi omillardan biri ham homiladorlik hisoblanadi. Qatiq esa nafaqat kandidoz balki vaginal infeksiyalar paydo bo‘lishining xavfini pasaytiradi.
Qatiq xolesterin darajasini kamaytiradi
To‘rtinchi jihat shundaki, qatiq qon tarkibida xolesterin darajasini kamaytirishga yordam beradi. Bunda so‘z, yuqorida eslatib o‘tilganidek, faqat tabiiy qatiq haqida ketmoqda! Aynan u “yomon” xolesterinni parchalashga yordam beradi.
Qatiq organizmni tozalaydi!
Beshinchi vazifa shundaki, qatiq yordamida organizmni tozalash mumkin. Qatiq organizm uchun keraksiz bo‘lgan barcha zararli modda va shlaklarni yumshoqlik bilan “supurib” chiqaradi.
Qatiq organizm katalizatori
Oltinchisi – qatiq organizm uchun o‘ziga xos katalizator vazifasini o‘tashi mumkin. Bu so‘zni maktab davrida – kimyo darsida eshitganimizni eslaysizmi? Har qanday jarayonlarni tezlashtiruvchi moddalar shu nom bilan ataladi. Agar homilador ayol doimo qatiq ichib tursa, boshqa mahsulotlar ham organizmda tezroq o‘zlashtiriladi. Ayniqsa birinchi trimestrda qatiq vitaminlar va kalsiyning o‘zlashtirilishiga yaxshi yordam beradi.
Qatiq oshqozon mikroflorasini tiklaydi
Yettinchi foydasi – ichak infeksiyasini davolatgan ayollar uchun xos. Davolash kursi, odatda, antibiotiklarsiz o‘tmaydi, ular esa ichakning, qolaversa oshqozonning ham mikroflorasini kuchli tarzda ishdan chiqaradi. Qatiq esa uni tiklashga yordam beradi. Buning ustiga, qatiq antibiotiklar bilan charchatib yuborilgan oshqozonni achishtirmaydi, bu ham homilador ayol uchun o‘ta muhimdir.
Qatiq immunitetni oshiradi
Sakkizinchi afzalligi immunitetni yaxshilashida. Zero, bo‘lg‘usi ona iloji boricha xastalanmasligi kerak! Qatiq – qondagi oq hujayralarning do‘sti hisoblanadi, ularning ishlashiga yordam beradi. Binobarin, oq hujayralarning asosiy ishi esa aynan xastaliklarni qo‘zg‘atuvchilarga qarshi kurashishdir.
Qatiq va allergiya
To‘qqizinchi foydasiga kelsak, qatiq amalda allergiyani qo‘zg‘atmaydi. Hatto tabiiy sut ichganda allergiyasi qo‘zg‘aydigan ayollar ham bemalol qatiq ichib, sutda mavjud bo‘lgan foydali moddalardan bahramand bo‘lishlari mumkin.
Qatiq ichak faoliyatini yaxshilaydi
O‘ninchi foydasi shundaki, qatiq ichakning faoliyatini yaxshilaydi va me’yoriga keltiradi. Har kuni qatiq ichadigan homilador ayolni qabziyat bezovta qilmaydi, chunki u peristaltikani yaxshilaydi. Qatiq tarkibida bo‘lgan laktobakteriyalar va kalsiy saraton xastaligi xavfini kamaytiradi.