Bo‘rijar (Bo‘rjar)

Post Views:
352

BO‘RIJAR (Bo‘rjar) – kanal, Bo‘zsuvning chap tarmog‘i. Oqtepa GES yuqorisidan boshlanadi. Uzunligi 5,4 km, suv sarfi 33 m3/s. Chilonzor va Yakkasaroy tumanlari hududidan oqadi. Bobur, Muqimiy, CHo‘ponota, Farhod, Do‘mbir­obod ko‘chasi hamda Katta O‘zbekiston trakti, Toshkent – Samarqand temir yo‘lini kesib o‘tib, Salor kanaliga qu­yiladi. Kanalning o‘zani chuqur bo‘lib, qirg‘oqlari tik. Ba’zi joylarida qirg‘oq yonbag‘irlarining balandligi 20–25 m ga yetadi, quyi oqimiga borgan sari pasayib, 8–10 m ga tushib qoladi. Kanalda 5 ta ko‘prik bor.

BO‘RIJAR GES (Turob To‘la ko‘chasi) – Toshkentning Bo‘zsuv kanalida qurilgan 3-gidroelektr stansiya. 1936 yil mayda ishga tushirilgan. Quvvati 6,4 ming kVt. Uning ishga tushirilishi Toshkent shahri sanoat korxonalari va aholisini elektr energiyasi bilan ta’minlashni yaxshiladi. Bo‘zsuv kanalida ishlab turgan GESlar O‘rta Osiyoda birinchi energiya tizimini yaratishga imkon berdi. Bo‘rijar GES Chirchiq–Bo‘zsuv traktida qurilgan GESlardan biri sanalib, u to‘la avtomatlashtirilgan, yagona dispetcherlik punktidan boshqariladi.

«BO‘RIJAR» MAHALLASI (20-mavze, 9) – Chilonzor tumanidagi mahalla. «Botirma», «Kichik Xirmontepa», «Xirmontepa», «Yakkatut», «Xayr­obod», «Mevazor» mahallalari hamda Ilonlikota qabristoni bilan chegaradosh. O‘tmishda bu yerlar «Bo‘rijar» deb atalgani uchun 1970 yil mahallaga shu nom berilgan. Aholisi 3960 kishi, asosan, o‘zbeklar, shuningdek, 10 dan ortiq millat vakillari yashaydi (2009). Mahalla hududida 8 oziq-ovqat do‘koni, dorixona, kafe, stomatologiya poliklinikasi, bank mavjud.

«Toshkent» ensiklopediyasi. 2009 yil