ATSETANILID

ATSETANILID, antifebrin, sirka kislota anilidi, C6H5NHCOCH3 — rangsiz kristall. Mol. m. 135,16. Zichligi 1026 kg/m3. Suyuqlanish t-rasi 114,2°, qaynash t-rasi 303,8°. Qaynoq suvda yaxshi erib, sovuq suvda erimaydi, organik erituvchilarning koʻpchiligida eriydi. Anilinga sirka kislota, sirka angidrid yoki xlor-angidrid taʼsir ettirish yoʻli bilan olinadi. Boʻyoq i. ch. da oraliq moddalarni sintez qilishda hamda tibbiyotda isitmani tushiruvchi va ogʻriq qoldiruvchi dori sifatida ishlatiladi.