ASQAR PICHOQSOZ

ASQAR PICHOQSOZ (asli nomi Asqarxoʻja Oysarxoʻja oʻgʻli, 1878 — Andijon viloyati Qoʻrgʻontepa tumanidagi Qorasuv qishlogʻi — 1964) — pichoqsoz usta. Qorasuv pichoqsozlik maktabining yirik vakili. Pichoq-sozlik hunarini usta Toʻxtasindan oʻrgangan. Qorasuv va Shahrixonda pichoqsozlik qilgan. Asqar pichoqsoz aʼlo nav poʻlatdan yupqa, ixcham, keskir, silliq va gʻoyat naqshdor pichoqlar yasagan. 2-jahon urushi davrida oʻzbek jangchilari uchun qilich va pichoq yasagan. 1948-y. dan Qorasuvda tashkil etilgan artelda ishlagan. Ustaning oʻz oʻgʻillari bilan yasagan pichoqlari Andijon, Oʻsh, Oʻzgan, Jalolobod va b. joylarda «Qorasuv pichogʻi» nomi bilan mashhur. Asqar pichoqsoz ishini oʻgʻli Bakirjon Asqarov va uning shogirdi Akromjon Toshboyevlar davom ettirmoqda.