ARDASHIR

ARDASHIR ,I Artashir Papakon (taxm. mil. 180 — 239 yoki 241) — Erondagi sosoniylar sulolasi asoschisi va dastlabki shohi. Ardashirning bobosi Soson Fors poytaxti — Istaxr sh. dagi bosh ibodatxonaning kohini boʻlgan. Ardashir Parfiya podshosi Artabon V (209 — 224)ning vassali Darabgird (Forsdagi qalʼa) hokimi saroyida xizmat qilgan. Taxm. 200-y. da ushbu qalʼa hokimi boʻlgan; tez orada butun Fors, Kirmon va Gey (hoz. Isfahon)ni oʻziga tobe etgan hamda zodagonlar va ruhoniylar madadiga tayanib Artabon V ga qarshi chiqqan. 224-y. 28 apr. da Ormizdagon tekisligida parfiyaliklarga qaqshatqich zarba bergan, Parfiya podsholigi shundan soʻngtugatilgan. 226/227-y. shahanshoh unvoni bilan toj kiygan. Ardashirning Mesopotamiya va Armanistonga egalik qilish uchun Rim bilan Sharkda olib borgan urushlari natijasida Sosoniylar davlati hududi ancha kengaygan.