ANTANTA

ANTANTA (frans. entente — bitim) —1) Buyuk Britaniya, Fransiya va Rossiyaning Germaniya, Avstriya-Vengriya xamda Italiya ittifoqiga qarshi tuzgan ittifoqi. «Uchlik bitimi», «Uchlik ittifoqi» deb ham yuritiladi. Antanta 1904—07 y. larda shakllandi. Har ikkala ittifoqning maqsadi 19-a. oxirida boʻlingan dunyoni qayta taqsimlashdan iborat edi. Birinchi jahon urushi davrida Antantaga Serbiya, Italiya, Yaponiya, Belgiya, Gretsiya va Ruminiya, keyinchalik urushga kirgan AQSH qoʻshildi.