AVVAL NEFT KONLARI

AVVAL NEFT KONLARI — Fargʻona viloyatidagi konlar, Fargʻona sh. dan 15 km jan. da. Avval neft konlari gʻarbdan sharqqa choʻzilgan antiklinal bukilmada boʻlib, 1953—54 y. larda elektrorazvedka usuli bilan ochilgan. 1955-y. da boshlangan qidiruv ishlari natijasida iyun oyida 5 – gorizontdan bir kechakunduzda 40 t. ga yaqin neft olinadigan quduq kavlangan. 1954-y. da asosiy Avval bukilmasining sharqida yangi bukilma — Sharqiy Avval bukilmasi aniqlandi. Bu bukilmalarning tuzilishida paleogen (qalinligi 250 m) va neogen (700 m) yotqiziqlari mavjud. Avval neft konlarida neft asosan 5 – gorizontda boʻlib, 6 – va 7 – gorizontlarda juda ham oz uchraydi. 5 – gorizont paleogenning Turkiston yarusi yotqiziqlaridagi darzli ohaktosh hamda qumtosh qatlamlaridan iborat. Neft bukilmaning sharqiy qismida toʻplangan boʻlib, gʻarbda uzilma bilan chegaralanadi. Neft bilan birga gaz ham olinadi.