* * *
Bu yorugʻ dunyodan yashab oʻtaman
Sevgiga toʻymasdan, toʻymasdan sheʼrga.
Bir tiniq tabassum bilan tutaman
Jonimni Ollohga,
jismimni yerga…
ESHAKNI ESLASH HAQIDA
Men
qachon
nodonni
soʻkmoqchi
boʻlsam,
sen
shunda
esimga
tushasan,
eshak…
AYOL SUYMAGAN ERKAK
Ayol suymagan erkak –
Ayol suymagan erkak…
***
Yoʻqotgan pulini izlaydi kimdir,
Yoʻqotgan yoʻlini izlaydi kimdir.
Pulga ham, yoʻlga ham solmasdan nazar,
Yoʻqotgan koʻnglini izlaydi kimdir.
HALI OʻLMAGAN ODAM
“Boshiga tosh bilan bir ursam…”,
deb oʻylaydi kimdir men xaqimda.
“Boshini bagʻrimga bossam…”,
deb oʻylaydi kimdir men haqimda.
Men esa
koʻtarib yuraman
oʻsha –
ming marta tosh tegib yorilgan,
issiq bagʻirlarda dimiqqan,
hamma uchun qiziq
boshimni…
TAʼRIF
Yerda tortish kuchi bor, toʻgʻri!
Allaqachon isbotlagan fan.
Ammo oʻsha quvvatning toʻri –
Oʻzbekiston atalgan maskan!
BAHOR
Yerning siynasidan toshdi harorat,
Haykal daraxtlarga takror kirdi jon.
Tomlarning labida turib omonat,
Yalqov mushuklar ham boshladi figʻon…
Shifokor quyoshning malham tigʻlari
Bemor jussasini uzdi toʻshakdan –
Ana, koʻtarildi bugʻdoy tugʻlari
Chorbogʻda qor bosib yotgan xashakdan…
Oʻchoqlar ogʻziga islanib qaytdi
Moʻrilar boʻgʻzidan tutgan tutunlar.
Eshitdim – Xudoga shukrona aytdi
Oxiri koʻrinib qolgan oʻtinlar…
Tuproq koʻpchib berdi yetilgan qizday,
Chapani ketmonga boqdi suzilib…
Boʻgʻotda xanjarga aylangan muzda
Qartaygan qish joni ketdi uzilib…
BIRINCHI SEVGIM
Yuragimga larzalar solgan
vulqonimsan, birinchi sevgim.
Oʻsmir yoshim ogʻzida qolgan
tolqonimsan, birinchi sevgim…
Kuygan mening yuragim, kuygan,
gʻam dilimga choʻgʻdan togʻ uygan…
Yoʻlbarslarga yedirib qoʻygan
jayronimsan, birinchi sevgim…
Xotiramni titganim-titgan,
Kelishingni kutganim-kutgan,
Ummonlarning tubi berkitgan
marjonimsan, birinchi sevgim.
Qayda oʻtgan yoshlikning yoʻli?
Koʻrinadi na oʻng, na soʻli…
Sen ham meni izlagan koʻngli
vayronimsan, birinchi sevgim…
Yoqtirmagan yoriga yoqqan,
Koʻzidan yosh shashqator oqqan,
Shafqatsiz bu taqdirga boqqan
jononimsan, birinchi sevgim…
Hayronimsan, birinchi sevgim,
Nolonimsan, birinchi sevgim,
Yuragimda ogʻrigʻi qolgan
armonimsan, birinchi sevgim…
MEVASIZ DARAXT
Uygʻotarkan uni ham bahor,
Yashil libos qilarkan sovgʻa,
“Gulladim-ku!” deydi baxtiyor,
“Meva-chi?” deb qilmaydi gʻovgʻa.
Qani, endi soʻz senga, gapir,
Shukrona shu emasmi axir…
SIZ ShOSHILMANG…
Siz shoshilmang,
oshiqmang buncha,
Hali baho berishga erta.
Shoir
hamma kabi
buguncha
Kuymalanib yuribdi yerda.
Sabr qiling,
dunyodan oʻtib,
Singib ketgach tuproqqa jismi,
Dilingizni sogʻinchi tutib,
Tilingizga toʻladi ismi…
OQ AYIQ
Ummon…
Ummon…
Qulochlari
cheksiz yoyiq…
Bahor kelib,
Eriyapti uning muzi…
Ummonning qoq oʻrtasida
bir oq ayiq
Holsiz suzib borayotir
yolgʻiz oʻzi…
Tirikchilik
shoʻrlikni shu holga solgan –
Baliqmi yo
bir baloni kelgan koʻzlab.
Sohil esa
ancha olis,
olis qolgan…
Toparmikin
endi uni
qayta izlab…
Eh, oq ayiq,
Uh, oq ayiq…
Oh, oq ayiq…
Ketmasaydi
adogʻi yoʻq suvda oʻlib…
Goʻl boʻlmasa,
Sohillarni badar qoʻyib,
Muzga ishonch bogʻlaydimi
kelib-kelib?
Oq ayiqqa
koʻnglim juda achishyapti…
Qolarmikin
cheksiz ummon ichra
omon…
U esa muz parchasiga yopishyapti,
Meni shu muz eltadi deb
sohil tomon…
ONA YURTGA TAʼRIF
Yerda tortish kuchi bor, toʻgʻri,
Allaqachon isbotlagan fan.
Ammo oʻsha quvvatning toʻri –
Oʻzbekiston atalgan maskan!
XALQ ShOIRI
Xalq shoiri xalq yukini yelkalaydi,
Yana yuking boʻlsa ber deb erkalaydi.
Xalq shoiri xalqdan ayro boʻlgan kuni –
Joni chiqmay turib tirik oʻlgan kuni…
NAVROʻZIM
Kel-yey, tenglik kuni, qutlugʻ adolat oni, Navroʻzim!
Adolatli diyorimning aziz mehmoni, Navroʻzim!
Sochib kel qir-adirlarga boychechak, lolaqizgʻaldoq,
Yashillik istagan yerning oʻzing boʻl joni, Navroʻzim!
Taqib olsin tovon oʻpgan sochiga tol popuklarni
Qoshi oʻsma suvin ichgan elim jononi, Navroʻzim!
Sumalak sayli boshlansin shahar-qishloq aro yoppa,
Ki birday qaynasin toʻq oshiyon qozoni, Navroʻzim!
Seni qoʻlga kiritguncha ulus qancha jafo chekdi…
Shukur, hurlikka ham yetdi ketib armoni, Navroʻzim!
Bahor boʻyin olib kelsin chugʻirlab ikki qaldirgʻoch,
Navolarga yana toʻlsin uyim ayvoni, Navroʻzim!
Oʻzing malham-davodirsan sogʻingan barcha dillarga,
Oʻzing qayta yaralmoqning goʻzal imkoni, Navroʻzim!
Sening manguliging istab Bahodir ham tilak qildi,
Qoʻlida xush sumalakka toʻla finjoni, Navroʻzim!
KOʻNGLI KIR KIMSAGA
Yomonlikni koʻzlayverib,
Pakkanggayam yetibsan –
Hammadan kir izlayverib,
Oʻzing kirlab ketibsan…
Bahodir ISO
https://saviya.uz/ijod/nazm/sevgiga-toymasdan-toymasdan-sherga/