Mamatqul Hazratqulov (1947)

Mamatqul Hazratqulov 1947 yili Samarqand viloyati Urgut tumanidagi Mingbuloq qishlogʻida tugʻildi. Toshkent davlat universiteti (hozirgi OʻzMU)ning jurnalistika fakulteti kechki boʻlimida tahsil oldi. “Oʻzbekiston madaniyati” (hozirgi “Oʻzbekiston adabiyoti va sanʼati” gazetasida (1965–1991), Oʻzbekiston Respublikasi Prezidenti devonida (1991–1993) xizmat qildi. 1993 yildan Oʻzbekiston Respublikasi Milliy Axborot agentligi bosh direktori lavozimida faoliyat yuritadi.

M. Hazratqulovning dastlabki mashqlari talabalik yillarida eʼlon qilingan. Hozirgacha “Oq qush” (1981), “Choʻli iroq” (1983), “Hayotning bir parchasi” (1983), “Intizor” (1985), “Quyosh men tomonda” (1986), “Qoʻzichoqning koʻz yoshlari” (1987), “Jurʼat” (1988), “Eshiklar ochiq” (1995). “Koʻkkoʻl” (2005), “Diydor” (2012), “Sevgi sozi” (2015) kabi hikoya va qissalar toʻplamlari nashr etildi. “Mehr koʻp koʻrguzdim” (1985), “Mehmon” (1986), “Qadrim” (1992), “Afandining yangi sarguzashtlari” (1993) kabi pyesalari respublikamizning poytaxt va viloyat teatrlarida sahnaga qoʻyildi. Bir necha telespektakllari televideniye orqali namoyish qilindi.

M. Hazratqulov tarjimon sifatida L. Tolstoy, V. Shukshin kabi rus adiblari, shuningdek, ozarbayjon, tojik, tatar va yapon yozuvchilarining hikoya, qissalarini oʻzbek tiliga oʻgirdi. Ayni choqda oʻzining ham bir qator hikoya va qissalari rus, tatar, ozarbayjon, qoraqalpoq tillariga tarjima qilingan.

Bulardan tashqari adib “Sayyora” opera librettosi, “Non”, “Ipaklari tillodan” nomli hujjatli filmlar, “Lev Tolstoy va oʻzbek adabiyoti” (1978) risolasi muallifi hamdir.

Oʻzbekiston Respublikasida xizmat koʻrsatgan jurnalist Mamatqul Hazratqulov 2011 yilda “Mehnat shuhrati” ordeni bilan taqdirlandi.

“Oʻzbek adiblari” (S. Mirvaliyev, R. Shokirova. Toshkent, Gʻafur Gʻulom nomidagi adabiyot va sanʼat nashriyoti, 2016) kitobidan.