Qushlarning ashulasi

 Koʻchat ekaman

Bogʻimizda tantana,

Erta tongdan shomgacha.

Chumchuq qoʻnib oladi

Devor osha tomgacha.

Qushlarning ashulasi

Bir-biriga ulanar.

Qaldirgʻoch tugul hatto

Bulbul navbat tilanar.

Qushlar bazmiga makon

Bobomlar ekkan daraxt.

Uzumlarni asrolmay

Baʼzan buvimlar karaxt.

Uzum yetar hammaga,

Deyman, bobomdek kulib.

Men ham koʻchat ekaman,

Daraxtga bola qilib.

 Koptok

Tomda, tarnov oldida

Eski koptok yotibdi.

Bilmadim, qaysi bola

Uni tomga otibdi?

Qor, yomgʻirda, oftobda

Shumshayib qolibdi u.

Oʻchib ketsa ham ranggi,

Goʻyoki gʻolibdir u.

Tushirmoq boʻlib obdon

Moʻljalga olibdilar.

Kitob, daftar, qalamdon…

Irgʻitib tolibdilar.

Koptok-chi, qatorlashgan

“Oʻq”lar bilan qolibdi.

“Tushmasang, tushma!”degan,

Doʻqlar bilan qolibdi.

Oʻjar bolalar misol

Aytganini qilibdi.

Oʻjar bolalar misol,

Yakkalik ne bilibdi…

Muhabbat

Muhabbat oilaning

Kenja qizi – shirini.

Nega bunday ekanin

Aytib beray sirini.

Akasiyu opasi

Ketishgach oʻqishiga,

Yordamlashar, yoʻq, demay,

Buvijonin ishiga.

Chelakchada suv sepib,

Hovlini supuradi.

Tuproqning nondek isi

Dimoqqa ufuradi.

Dastroʻmolini yuvib,

Quritadi soʻrida.

Buvisi esa maqtar

Oʻtirib uy toʻrida.

Zeriktirmasdan hatto

Qoʻshiq aytib beradi.

Buvijoniga yoshlik

Paytin qaytib beradi.

Ulgurar qoʻgʻirchogʻin

Allalab uxlatishga.

Hatto gazga choy qoʻyar

Oyijoni qaytishga.

Hammani qarshi olar

Bir-bir: “Salom”, “salom”lab.

Erka qiz boʻlib qolar

Dadasini achomlab.

Shirintoy

Shavkatjonning sevgani

Shirin choy, shirin choy.

Shunga hamma der uni

Shirintoy, Shirintoy.

Ichar solib novvot, qant –

Shirin choy, shirin choy.

Qoʻl yuvmas berguncha pand

Shirintoy, Shirintoy.

Qoʻli tugul yuz, quloq

Shirali, shirin choy.

Dangasa ham erinchoq

Shirintoy, Shirintoy.

Shunday qilsa bermaymiz

Shirin choy, shirin choy.

Erkalatib, demaymiz,

Shirintoy, Shirintoy.

Umida ABDUAZIMOVA

“Sharq yulduzi”, 2011–3